БНСУ-ийн тамирчин Ким Юн Жи өвлийн паралимпын наадмаас алтан медаль хүртсэн анхны солонгос эмэгтэй болж түүхэнд бичигдлээ.

Тэрээр 2026 оны өвлийн паралимпын үеэр Италийн хойд хэсгийн Tesero Cross-Country Skiing Stadium цанын цогцолборт болсон пара биатлоны эмэгтэйчүүдийн сууж гүйх төрөлд түрүүлжээ.

Ким уралдааныг 38 минут 00.01 секундэд дуусгаж, Германы Аня Викерээс 12.8 секундээр хурдалж түрүүлсэн байна.

Харин АНУ-ын Кендалл Греч 38:47.9 амжилтаар хүрэл медаль хүртжээ.

Энэ нь БНСУ-ын хувьд 2018 оноос хойших анхны өвлийн паралимпын алт бөгөөд мөн гадаад улсад болсон паралимпоос хүртсэн анхны алтан медаль болсон байна.

Пара биатлон нь 12.5 км-ийн зайд гүйлтийн цана болон буудлагыг хослуулсан спорт бөгөөд тамирчид нийт дөрвөн удаа буудлага хийж, тус бүрт 5 сум тавьдаг. Хэрэв бай онохгүй бол алдаа бүрт нэг минутын торгууль нэмэгддэг.

Ким эхний буудлагын цэг дээр 5 сумаа бүгдийг нь онож төгс гүйцэтгэл үзүүлсэн бол дараагийн буудлагын үед хоёр удаа алдсанаар тавдугаар байр руу ухарсан байна. Гэвч сүүлийн хоёр буудлагын үеэр дараалан 10 байг онож, эцэст нь алтан медалийн болзол хангажээ.