Форбес сэтгүүл дуучин Бейонсиг тэрбумтан болсныг зарлалаа. Мөн түүнийг дэлхийн хамгийн чинээлэг хүмүүсийн жагсаалтад багтсан тав дахь хөгжимчин болж буйг онцгойлон дурджээ. Форбесийн мэдээлснээр тус жагсаалтад Тайлор Свифт, Рианна, Брюс Спрингстийн болон Бейонсигийн нөхөр Жей Зи багтдаг байна.
Форбесийн зүгээс Жей Зигийн цэвэр хөрөнгийг 2.5 тэрбум ам.доллар гэж тооцжээ. Энэ сарын эхээр Форбес Бейонсигийн цэвэр хөрөнгийг 800 сая ам.доллар гэж үнэлээд, олон жилийн амжилтынхаа үр дүнд анх удаа тэрбумтны босгыг давна гэж таамаглажээ. Түүний 2023 оны Renaissance World Tour бараг 600 сая ам.долларын орлого олж, түүний Тайлор Свифттэй эн зэрэгцэх дэлхийн хамгийн том поп хөгжмийн оддын нэг гэдгийг баталсан. Бейонси уг тоглолтын кино хувилбарыг бүтээж, AMC кино театрын сүлжээгээр шууд түгээх гэрээ байгуулсан бөгөөд дэлхий даяар зарагдсан 44 сая ам.долларын тасалбарын орлогын бараг талыг нь өөртөө авчээ. Энэ нь түүний сүүлийн долоон жилийн хугацаанд хийсэн анхны бие даасан аялан тоглолт байв.
2024 онд гаргасан Cowboy Carter цомог нь кантри хөгжмийн хар арьстнуудтай холбоотой түүх, уг гарлыг онцлон харуулсан бүтээл байсан бөгөөд шүүмжлэгчдээс өндөр үнэлгээ авч, Грэмми Авардсаас “Оны шилдэг цомог” шагнал хүртсэн. Энэ нь Бейонси тус шагналыг хүртсэн анхны тохиолдол бөгөөд өмнө нь уг шагналд дөрвөн удаа нэр дэвшиж байсан юм. Форбесийн тооцоолсноор Cowboy Carter аялан тоглолтын тасалбарын борлуулалт 400 сая ам.доллараас давж, тоглолтын үеийн бараа бүтээгдэхүүний борлуулалтаас нэмэлтээр 50 сая ам.доллар олжээ. Энэхүү тоглолт Лондонгийн Tottenham Hotspur Stadium болон Парисын Stade de France цэнгэлдэх хүрээлэнд тасалбарын рекорд тогтоосон ч зарим газарт борлуулалт удааширч, суудал дүүргэхийн тулд зохион байгуулагчид тасалбарын үнийг бууруулахад хүрсэн тохиолдол гарсан. Гэсэн ч 2025 онд Их Британид айлчилсан бүх уран бүтээлчдээс хамгийн өндөр үнэтэй тасалбар Бейонсигийнх байсан бөгөөд дээд үнэ нь 950 фунт, хамгийн хямд нь 71 фунт байжээ.
Форбес Бейонсиг Нэтфликсийн Зул сарын өдрийн анхны NFL тоглолтын завсарлагааны тусгай шоунаас ойролцоогоор 50 сая ам.доллар, түүнчлэн Лэвайс брэндийн сурталчилгааны цувралаас 10 сая ам.доллар олсон гэж тооцсон байна.
