Нийслэл хотын замын хөдөлгөөний аюулгүй байдлыг дээшлүүлэх, зам тээврийн ослоос урьдчилан сэргийлэх зорилгоор гол болон туслах гудамж, замуудад нарны эрчим хүчээр цэнэглэгддэг замын тэмдэглэгээний LED гэрлийг суурилуулжээ.
Тодруулбал, Уулын зам, Наадамчдын зам, Чингисийн өргөн чөлөөний авто замд нийт 976 ширхэг LED гэрэл байршуулсан байна.
Тус гэрлүүдийг замын зорчих хэсэг, уулзвар, огцом эргэлт, явган хүний гарц, тусгаарлах зурвас зэрэг хөдөлгөөний аюулгүй байдлыг хангахад онцгой анхаарах шаардлагатай хэсгүүдэд суурилуулжээ.
Нарны эрчим хүчээр цэнэглэгддэг уг гэрэл нь шөнийн цагаар болон манан, цас, бороо, тоосжилт зэрэг шалтгаанаар үзэгдэх орчин хязгаарлагдсан үед замын чиглэл, эгнээний зааг, авто замын ирмэгийг жолоочид илүү тодорхой харах боломжийг бүрдүүлнэ гэж Нийслэлийн замын хөгжлийн газраас мэдээллээ.
