Олон улсын сагсан бөмбөгийн холбооноос зохион байгуулдаг 3х3-ын цуврал тэмцээн энэ сарын 23-наас 28-ний өдрүүдэд Улаанбаатарт болох гэж байна. Тодруулбал, энэ сарын 23, 24-нд “FIBA 3x3 Sukhbaatar Challenger”, 25, 26-нд “FIBA 3x3 Ulaanbaatar Women’s Series”, 27, 28-нд “FIBA 3x3 Ulaanbaatar World Tour” тэмцээн болно.

3х3-ын цувралын эхний тэмцээн болох “Sukhbaatar Challenger”-д Серби, Япон, Монгол, Испани, Тайвань, АНУ, Хорват, Литва, Шинэ Зеланд, Өмнөд Солонгос гэсэн 11 орны 16 баг өрсөлдөнө. Энэ тэмцээнд манай улсаас “Улаанбаатар Энержи”, “Сансар”, “Хархорум”, “Тэрэлж” гэсэн дөрвөн баг оролцох аж. Тус тэмцээнд түрүүлсэн баг “Lausanne masters”-т оролцох эрх халаасална. Мөн “FIBA 3x3 Ulaanbaatar World Tour”-д долоон орны шилдэг 12 баг оролцох юм. Тэгвэл “FIBA 3x3 Ulaanbaatar Women’s Series” тэмцээнд 10 улсын 16 баг өрсөлдөнө.

Эдгээр тэмцээнээс олимпын эрхийн оноо олгох бөгөөд “FIBA 3x3 Ulaanbaatar World Tour”-д хамгийн өндөр оноо өгөх ажээ.