Өмнөд Солонгосын 10 хүн тутмын 7 нь өсвөр насныхны сошиал медиа хэрэглээг хязгаарлах бодлого нэвтрүүлэхийг дэмжиж байна гэсэн судалгааны дүн гарчээ. Энэ нь сошиал медиа платформыг хэтрүүлэн ашиглахтай холбоотой санаа зовнил нэмэгдэж буйтай холбоотой.

Өнгөрсөн сард Солонгосын Хэвлэлийн сангаас 14-58 насны 1000 хүнийг хамруулан явуулсан судалгаагаар оролцогчдын 70.7 хувь нь ийм бодлогыг дэмжиж байгаагаа илэрхийлсэн бол 29.3 хувь нь эсэргүүцсэн байна.

Гэвч нийт оролцогчдын тавны нэгийг бүрдүүлсэн өсвөр насныхны дунд 59 хувь нь уг төлөвлөгөөг эсэргүүцсэн бол 41 хувь нь дэмжжээ.

Өсвөр насныхны сошиал медиа хэрэглээнд хязгаарлалт тогтоох бол хэдэн наснаас эхлүүлэх нь зохистой вэ гэж асуухад нийт оролцогчдын 16.8 хувь нь 15 насыг сонгосон байна. Үүний дараа 14.9 хувь нь 18 нас, 13.1 хувь нь 11 болон түүнээс доош насыг сонгожээ.

Гэсэн хэдий ч оролцогчдын олонх нь ийм бодлого нэвтрүүлсэн ч өсвөр насныхны сошиал медиа хэрэглээг хязгаарлахад тодорхой бэрхшээл тулгарна гэж үзсэн аж. Тухайлбал, өсвөр насныхан бусдын бүртгэлээр нэвтрэх эсвэл хязгаарлалт үйлчлэхгүй шинэ платформ руу шилжих боломжтой гэж судалгаанд оролцогчид үзжээ.

Ийм нөхцөлд платформууд хэрэглэгчдэд хязгаарлалт тавихаас илүүтэйгээр сошиал медиа ашиглах аюулгүй орчныг бүрдүүлэхийн тулд илүү их зүйл хийх ёстой гэж 59.8 хувь нь үзсэн байна.

Өнгөрсөн долоодугаар сард тус улсын хэвлэл мэдээллийн салбарын хяналтын байгууллага 14 болон түүнээс доош насны хүүхдүүдэд сошиал медиа ашиглах хязгаарлалт тогтоох санаачилга дэвшүүлсэн юм. Тус байгууллага өсвөр насныхны сошиал медиа хэрэглээг хэтрүүлэн ашиглах явдал дэлхий нийтийн асуудал болоод байгааг онцолжээ.