Ирц бүрдэхгүй байгаагаас Улсын Их Хурлын чуулганы нэгдсэн хуралдаан өнөөдөр дахин хойшиллоо.
Тэгвэл эрх баригч МАН-ын бүлэг 14 цагаас ээлжит бусаар хуралдаж, цаг үеийн асуудлаар улс төрийн шийдвэр гаргахаар болсон тухай бүлгийн дарга Ж.Батжаргал мэдээллээ. Тэрээр "Ард түмний итгэлийг хүлээн төр барих төлөөллийг хэрэгжүүлж байгаа Их хурлын гишүүд хууль дүрэм журамдаа захирагдах ёстой. Ирц бүрдүүлэхээр гишүүн болгонтой ярьсан. Өнөөдрийн байдлаар манай бүлгийн 8 гишүүн эрүүл мэндийн шалтгаантай байна. 3 хүн гадаадад яваа бол 2 гишүүн хүндэтгэн үзэх шалтгаанаар чөлөөтэй байгаа. Бололцоотой ирц бүрдэнэ гэж тооцсон ч ирц бүрдсэнгүй. Тиймээс 14 цагт бүлгийн хуралдааныг зарлалаа. МАН-ын бүлгийн гишүүдээс ямар нэгэн улс төрийн шаардлага тавьсан зүйл одоогоор байхгүй. Гишүүд бүлгийн хурал дээр тодорхой байр сууриа илэрхийлэх байх гэж бодож байна" гэв.
УИХ дахь бүлгийн хурлын дараа МАН-ын Удирдах зөвлөл хуралдахаар болжээ.
