Улсын хэмжээнд өнөөдөр 14:00 цагийн байдлаар нэг түймрийг цурамд оруулж, хоёр түймрийг унтраахаар ажиллаж байгаа талаар Онцгой байдлын ерөнхий газраас мэдээллээ.
Тодруулбал, Дорнод аймгийн Халхгол сумын Ташгай багийн “Баянбүрд” гэдэг газарт 10:15 цагт гарсан хээрийн түймрийн дуудлагын дагуу аймгийн гал түймэр унтраах, аврах 62 дугаар анги болон сумын мэргэжлийн ангийн алба хаагчид ажиллаж байна.
Мөн Хэнтий аймгийн Мөрөн сумын Бүрээт багийн “Уртын хадаг” гэдэг газарт 11:30 цагт гарсан хээрийн гал түймрийн голомтод аймгийн Онцгой байдлын газар, Мөрөн, Хэрлэн сум болон Өлзийт тосгоны мэргэжлийн ангийнхан ажиллаж, 13:20 цагт цурамд оруулжээ. Одоогоор бүрэн унтраахаар ажиллаж байгаа аж.
Түүнчлэн Дорнод аймгийн Чойбалсан сумын Хөх нуур багийн “Хоёр хярт” гэдэг газар 11:45 цагт гарсан хээрийн түймрийг унтраахаар шуурхай арга хэмжээ авч байгаа талаар Онцгой байдлын ерөнхий газраас мэдээллээ.
