УИХ-ын Хууль зүйн байнгын хорооны хуралдаанаар хүн худалдаалах гэмт хэрэгтэй тэмцэх чиглэлээр хэрэгжүүлж буй арга хэмжээний талаарх Засгийн газрын мэдээлэл сонслоо. Энэ үеэр дараах хэлэлцүүлэг өрнөв.
УИХ-ын гишүүн Б.Баярбаатар: -Олон гишүүн Жеффри Эпштейн гэж хүнтэй холбоотой асуудлыг ярилаа. Энэ хүн дэлхийд муу муухайгаараа жигшигдэж, үзэн ядагдаж байгаа. Олон мэдээлэл нь албан ёсны эх сурвалжаас ил тод болсон. Харамсалтай нь, өнөөдөр Монгол Улсын Төрийн тэргүүнээр ажиллаж байсан хоёр, Ерөнхий сайдаар ажиллаж байсан нэг хүн нэг холбогдсон асуудал АНУ-ын албан ёсны вэбсайт дээр ил тод мэдээлэл гарлаа. Энэ хүнтэй холбоотой 3.5 сая хуудас материал ил тод болсон. Энд Гадаад хэргийн сайд асан, Ерөнхийлөгч асан Ц.Элбэгдоржийн зөвлөх асан Л.Пүрэвсүрэн гэдэг хүний нэр одоогийн байдлаар шүүгээд үзэхэд 219 удаа дурдагдсан байна.
"Liberty partners" ХХК-ийн захирал Ч.Ганбат гэдэг хүний нэр энэ захидал харилцааны явцад 194 удаа дурдагдсан байна. Ерөнхийлөгч асан Х.Баттулгын 81 удаа дурдагдсан байна. Ерөнхийлөгч асан Ц.Элбэгдоржийн нэр 41 удаа дурдагдсан байна.
Жеффри Эпштейн гурван чиглэлээр үйл ажиллагаа явуулж байсан нь тогтоогдсон.
Нэгдүгээрт, бэлгийн хүчирхийлэл буюу бага насны хүүхдийн хүчирхийлэгч.
Хоёрдугаарт, мөнгө угаагч, санхүүгийн гэмт хэрэгтэн.
Гуравдугаарт, улс орны эрх бүхий албан тушаалтанд улс төрийн нөлөөлөл үзүүлэгч, лоббидогч. Энэ гурав нь хоорондоо уялдаатай.
Английн хунтайж бүх хэргэм зэргэмээ хураалгаад иргэд нь улсаасаа хөөх асуудал ярьж байна. Олон албан тушаалтнууд огцроод хууль хяналтын байгууллагатаа шалгагдаад явж байна. Ц.Элбэгдоржийг төлөөлж Л.Пүрэвсүрэн гэдэг хүн олон удаагийн захидал харилцааг Жеффри Эпштейнтэй бичсэн нь ил болсон. Үүний нэг жишээ нь, “Нью-Йоркод уулзахдаа нэг сюрпризтэй ирнэ. Тэр нь монгол охин байна” гэж байгаа юм. Тэгтэл нөгөөх нь “Ямар сайхан мэдээ вэ, удахгүй уулзацгаая” гэсэн хариу ирсэн имэйл нь ил тод байна. Энэ охин АНУ-руу явсан уу. Энэ хүний наймааны асуудал биш үү. Бэлгийн хүчирхийллийн асуудал байж болох уу. Явсан бол энэ охин эргэж ирсэн үү. Өнөөдөр амьд сэрүүн байна уу.
Ерөнхийлөгч асан Ц.Элбэгдоржийн өргөж аваад өсгөж хүмүүжүүлээд байсан хүүхдүүд нэр устайгаа хаана байна. Цагдаагийн байгууллага тодруулсан уу. Ц.Элбэгдоржийн олон сая ам.доллар үнэ бүхий уран зураг, үнэт зүйл, эдлэн газар, хаус худалдаж авахыг санал болгосон. Энэ өртөг нь 500 сая гаруй ам.доллар. Монгол Улсын Ерөнихйлөгч өнөөдөр хэдэн төгрөгийн цалин авдаг вэ. Энэ хүн Ерөнхийлөгчөөр хоёр удаа сонгогдоод дараа нь АНУ-д ажиллаж амьдраад энэ хэмжээний мөнгө хуримтлуулах боломж бололцоо нь байдаг юм болов уу. Их тэнгэрээс 21 уран зураг алга болсон гэх мэдээлэл байна. Цагдаагийн байгууллагад энэ талаар мэдээлэл байна уу?
Х.Булгантуяа гишүүний хэлж байгаа үнэн байх. Янз бүрийн үдэшлэг зохион байгуулаад нөлөө бүхий албан тушаалтнуудыг урьж оролцуулж, бэлгийн хүчирхийлэл үйлдүүлж, түүнийгээ дүрс бичлэгт баримтжуулан авч, түүгээрээ улстөрчдийг шантаачилж тухайн улсад нь улс төрийн шийдвэр гаргуулдаг нөхцөл байдал харагдаад байна.
Одоогоос 12 жилийн өмнө Дубайд болсон морин уралдааны нэг билет нь 23 сая төгрөг. Жеффри Эпштейний зуучлалаар манай эрх мэдэлтнүүд очиж үзсэн. 2014 онд уралдаан үзээд 2015 онд Дубайн гэрээ байгуулагдсан. Шалгах ёстой үндэслэл мөн үү гэвэл мөн.
ЦЕГ-ын тэргүүн дэд дарга Э.Ганчулуун: -Жеффри Эпштейний хэрэгтэнй холбоотой асуудлаар цагдаагийн байгууллага шалгалт судалгаа хийж байгаа.
Их тэнгэрээс 21 уран зураг алга болсон гэх хэрэгийг цагдаагийн байгууллага шалгаж байгаа. Гэхдээ яг одоо ямар нэгэн гэмт хэргийн тухай дэлгэрэнгүй ярих боломжгүй.
Ерөнхийлөгч асан Ц.Элбэгдоржийн өргөж авсан 23 хүүхэдтэй холбоотой мэдээллийг шалгаж үзсэн. Гурван хүүхэд нь насанд хүрээд 2025 онд улсын хилээр гарсан. Бусад хүүхэд нь өнөөдөр Монголдоо амьдарч байгаа.
