Үндэсний их баяр наадмын өдрүүдэд буюу 2026 оны долоодугаар сарын 10-19-ний хооронд Онцгой байдлын байгууллага албаны өндөржүүлсэн бэлэн байдлын зэрэгт шилжин ажиллажээ.
Энэ хугацаанд улсын хэмжээнд гамшиг, аюулт үзэгдэл, ослын нийт 142 дуудлага бүртгэгдсэн байна. Дуудлагын дагуу төв, орон нутгийн Онцгой байдлын байгууллагын 926 алба хаагч, 194 техник хэрэгсэлтэйгээр үүрэг гүйцэтгэжээ.
Аврагчид гамшиг, осол, аюулт үзэгдлийн голомтоос 39 хүний амь насыг аварч, 75 иргэнд тусламж үйлчилгээ үзүүлэн аюулгүй байдлыг ханган ажилласан байна.
Баяр наадмын өдрүүдэд нийслэлийн гурван дүүрэг, зургаан аймгийн 12 суманд усны ослын 23 тохиолдол бүртгэгдэж, 13 хүн (11 том хүн, хоёр хүүхэд) амиа алджээ.
Харамсалтай нь дээрх хугацаанд усны ослоор 13, объектын гал түймэрт хоёр, зам тээврийн ослоор нэг, өндрөөс унах ослоор нэг, ахуйн бусад ослоор хоёр хүн буюу нийт 19 хүн эндсэн талаар Онцгой байдлын байгууллагаас мэдээллээ.
