Шүүх шинжилгээний байгууллагын нөхцөл байдал ялангуяа хөдөө орон нутагт маш хүндрэлтэй байгаа асуудлаар ХЭҮК-ын гишүүн Б.Энхболд мэдээлэл өглөө.
Тэрбээр “ХЭҮК-оос нийслэлийн зургаан дүүрэг, 21 аймаг, дөрвөн сум болон улсын хэмжээнд үйл ажиллагаа явуулж буй Шүүх шинжилгээний ерөнхий газар-т хяналт шалгалт хийсэн. Шалгалтаар орон нутгийн шүүх шинжилгээний байгууллагуудын орчин нөхцөл, лаборатори, барилга байгууламж маш муу гэсэн дүгнэлт гарсан. Тухайлбал, Шүүх шинжилгээний байгууллага нь хараат бус бие даасан байх ёстой. Гэтэл энэ байгууллага нь өөрсдийн гэсэн барилаггүй, эсвэл ашиглалтын хугацаа нь дуусаад дүгнэлт гарчихсан барилга дотор үйл ажиллагагаа явуулж байна. Тухайлбал, цагдаагийн байгууллагын аль нэг жигүүрт нь буюу нэг өрөөнд нь үйл ажиллагаа явуулдаг, мөн орон нутгийн тамгын газрын байранд үйл ажиллагаа явуулж байгаа нь хохирогчийн эрх, нууцлал, аюулгүй байдал, хүнлэг орчинд шинжилгээнд хамрагдах эрхийг зөрчиж байна.
2025 оны байдлаар орон нутагт хүний биед хийсэн шинжилгээний 1024 тохиолдол эрүүл ахуйн шаардлага хангаагүй, стандартад нийцээгүй орчинд хийгдсэн байна. Үүний 160 орчим нь бэлгийн хүчирхийлэлтэй холбоотой шинжилгээ байсан бөгөөд 79 нь насанд хүрээгүй хохирогчод байжээ. Энэ нь хохирогчийг дахин хохироож буй нөхцөл байдал гэж үзэхээр байгаа юм. Үүнээс гадна Шүүх шинжилгээний байгууллагын алба хаагчдын цалин хөлс хангалтгүй, илүү цагын хөлсыг бүрэн олгодоггүй, ажиллах орчин нөхцөл нь хүйтэн, шаардлага хангаагүй зэрэг олон зөрчлүүд үүссэн байна. Түүнчлэн, хүний биеэс авсан биологийн дээжийг тусгай химийн бодист хадгалах зориулалтын өрөө байхгүйгээс шалтгаалж ажилтнууд ажлын өрөөнийхөө булан, тохойд хадгалж байна. Энэ нь ажилтнуудын эрүүл, аюулгүй орчинд ажиллах эрхийг зөрчиж буй нөхцөл болж байна. Тиймээс стандартын шаардлага хангасан тусгай өрөө тасалгаа гаргаж, дээж хадгалах нөхцөлийг бүрдүүлэх зайлшгүй шаардлагатай гэж дүгнэсэн.
Мөн орон нутаг дахь бүх цогцос хадгалах өрөө зориулалтын бус байгаа нь хяналт шалгалтаар илэрсэн. Зориулалтын хөргүүр байхгүйгээс ахуйн зориулалтын хөлдөөгч, хөргүүрийг үйл ажиллагаандаа ашиглаж байгаа нь тогтоогдсон. Иймээс дээрх асуудлыг стандартын дагуу шийдвэрлэж, тусгай зориулалтын өрөө болон хөргүүрийг яаралтай шийдэх шаардлагатай байна” гэлээ.
