Израилийн арми Газын зурвасын хэд хэдэн хэсэгт халдлага үйлдсэний улмаас дор хаяж найман палестин хүн амиа алдсаны дотор Газа хотын их сургуулийн кампуст болсон халдлагын хохирогчид багтаж байна.

Ням гарагт Израилийн агаарын цохилтын улмаас Газа хот дахь Исламын их сургуулийн кампусын аюулгүй байдлын гурван ажилтан амиа алджээ. Энэ нь тус их сургууль руу хэдхэн цагийн дотор хийсэн хоёр дахь халдлага байв.

Халдлагын дараахан хэргийн газраас мэдээлэл дамжуулсан Al Jazeera телевизийн сурвалжлагч Хани Махмуд халдлагын үр дагавар асар их байсныг онцолжээ.

Тэрбээр хэргийн газарт хүний амь эрсэдсэн ноцтой дүр зураг ажиглагдаж, шатсан бетон болон бусад материалын хурц үнэр ханхалж байсан тухай мэдээлсэн байна.

Махмудын хэлснээр, Al Jazeera телевизийн багийнхан халдлага болохоос өмнөхөн тус газарт зураг авалтаа дуусгаж, аюулгүй байдлын гурван ажилтантай мэндлээд явсан бөгөөд удалгүй тэд агаарын цохилтод өртөн амиа алджээ.

Үүнээс өмнө их сургуулийн кампус руу нисгэгчгүй нисэх төхөөрөмжөөр цохилт өгсний улмаас долоон эмэгтэй оюутан хэлтэрхийд өртөн гэмтжээ.

Газын зурвасын өмнөд хэсэгт орших Хан Юнис хотын Аль-Маваси бүсэд Израилийн арми их буугаар галласны улмаас хоёр хүн амиа алдсан тухай Нассерын эмнэлгийн цогцолбор мэдээлжээ. Мөн хэд хэдэн хүн, тэдний дотор нэг хүүхэд шархадсан байна.

Үүнээс гадна Газын зурвасын төв хэсгийн Дейр аль-Балах хотын зүүн хэсэгт Израилийн нисгэгчгүй нисэх төхөөрөмжийн цохилтын улмаас нэг хүн амиа алджээ.

Мөн Газын зурвасын хойд хэсэгт орших Хамад эмнэлгийн ойролцоох Аль-Рашид гудамжинд болсон халдлагын улмаас нэг хүн амиа алдаж, хэд хэдэн хүн шархадсан тухай Палестины WAFA мэдээллийн агентлаг мэдээлсэн байна.

Ням гарагийн орой Хан Юнис хотын зүүн хэсэгт орших Шейх Нассер хорооллыг онилсон Израилын өөр нэг халдлагын улмаас нэг эрэгтэй амиа алдаж, хэд хэдэн хүн гэмтжээ.