Өнгөрсөн долоо хоногт өрнөсөн үйл явдлыг эргэн сануулж, тоймлон хүргэж байна.
Вакцин нь нэвтрээгүй шүлхий тархав
Баян-Өлгий аймгийн Алтай сумын нэгдүгээр багийн нутаг Хужирт хэмээх газар тавдугаар сарын 22-нд шүлхий өвчний тохиолдол илэрсэн. Хамгийн ноцтой нь уг өвчин манай улсад өмнө нь бүртгэгдэж байгаагүй, вакцин нь ч нэвтрээгүй шүлхийн SAT-1 хэмээх хэв шинж юм. Өдгөө уг өвчин Ховд аймгийн Булган, Үенч суманд мөн бүртгэгдэж, нийт 700 орчим малд халдварлаад байгаа юм. Холбогдох журмын дагуу өвчилсөн малыг шууд устгах арга хэмжээ авч байгаа бөгөөд нийт өвчилсөн малын 77.2 хувийг устгалд оруулжээ.
Шүлхий өвчин нийт долоон хэв шинжтэй. Манай улсад А,O хэвшил нь зонхилон гардаг бөгөөд түүнд тохирох вакциныг жилд хоёр удаа хийдэг аж.Одоо дэгдээд буй хэв шинжээс урьдчилан сэргийлэх вакцинд манай мал сүрэг хамрагдаагүй учир өвчлөл газар авах эрсдэлтэй байгаа юм. Тиймээс ОХУ-аас эхний ээлжид 1.5 сая тун вакцин захиалж, татаж авахаар болжээ. Гэвч вакциныг 45 хоногийн хугацаанд үйлдвэрлэж, манай улсад нийлүүлэх хүлээлттэй байна.
Суррон, скүүтерийн хэрэглээг хуулиар зохицуулна
“Замын хөдөлгөөний аюулгүй байдлын тухай хуульд нэмэлт, өөрчлөлт оруулах тухай” хуулийн төсөл УИХ-ын нэгдсэн чуулганаар дэмжигдлээ. Ингэснээр нийслэлийн иргэдийн түгээмэл хэрэглээ болсон ч нөгөө талд осол гэмтлийн зонхилох шалтгаалан болоод буй суррон, скүүтерийн хэрэглээг зохицуулах боломжтой болж байна.
Энэхүү хуулиар сурроныг 18 нас хүрсэн А ангиллын жолоодох эрхийн үнэмлэхтэй хүн жолоодох, скүүтер, мопедыг 18 нас хүрсэн хүн унадаг дугуйн зам, эсвэл авто замын зорчих хэсгийн баруун эгнээгээр жолоодож замын хөдөлгөөнд оролцохоор заажээ. Мөн суррон, мопедыг явган хүний замаар зорчуулахгүй, явсан тохиолдолд Зөрчлийн тухай хуулиар торгох юм. 18 нас хүрээгүй хүүхэд скүүтер, мопед унасан тохиолдолд эцэг эхэд хариуцлага тооцохоор хуульд тусгасан байна.
Тэгвэл АТГ-аас мопед, скүүтер болон түүнтэй адилтгах үзүүлэлт бүхий тээврийн хэрэгслийг замын хөдөлгөөнд оролцуулах шийдвэрийг хянаж, хүчингүй болгосныг мэдээллээ. Тухайлбал, түрээсийн үйл ажиллагаа явуулах энгийн зөвшөөрлийг нэр бүхий 6 аж ахуйн нэгжид олгосон нь эрх зүйн зохицуулалт байхгүй, зөвшөөрлийн улсын тэмдэгт, татвар, төлбөр хураамжийн хэмжээ тодорхойгүй, мопед болон скүүтер нь одоогоор ямар тээврийн хэрэгсэлд хамаарахыг хууль тогтоомжид тодорхойлоогүй, нийслэлийн хэрэгжүүлэгч агентлагууд нь хуулиар олгоогүй эрхийг хэрэгжүүлсэн зэрэг нөхцөл байдал тогтоогдсон байна. Тиймээс нийслэлийн Засаг даргын захирамжаар мопед, скүүтер болон түүнтэй адилтгах үзүүлэлт бүхий тээврийн хэрэгслийг хязгаарлалттайгаар оролцуулах, зөвшөөрөл олгох тухай өмнөх захирамжуудыг хүчингүй болгожээ.
Үндэсний баяр наадмын тухай хуулиа дахиад завсарлана
Нийгэмд талцал маргаан дагуулаад байгаа Үндэсний их баяр наадмын тухай хуулийн нэмэлт, өөрчлөлтийг УИХ-аар хэлэлцэхийг дэмжлээ.
Мягмар гарагт УИХ-ын Төрийн байгуулалтын байнгын хорооны өнөөдрийн хуралдаанаар Үндэсний их баяр наадмын тухай хуульд нэмэлт өөрчлөлт оруулах тухай хоёр хуулийн төслийг парламентаар хэлэлцэх эсэхийг хэлэлцсэн юм. П.Сайнзориг нарын 19 гишүүний өргөн барьсан хуулийг хэлэлцэхийг дэмжсэн бол О.Амгаланбаатар нарын төсөл ТББХ-ны босго давсангүй.
Улмаар пүрэв гарагт чуулганы нэгдсэн хуралдаанаар О.Амгаланбаатар нарын 41 гишүүний боловсруулсан хуулийн төслийг хэлэлцэх асуудлыг дараалалд оруулсан байсан ч хууль санаачлагч хуулийн төслөө хэлэлцүүлэхийг хойшлуулж буйгаа мэдэгдсэн юм.
Харин П.Сайнзориг нарын 19 гишүүний санаачлан, өргөн мэдүүлсэн хуулийн төсөлд Их Монгол Улс байгуулагдсаны тэгш ой тохиох жилүүдэд 1024 бөх барилдуулах асуудлыг Монгол Улсын Ерөнхийлөгч тухай бүр шийдвэрлэдэг байхаар тусгасан байна. Мөн хуульд “аймгийн харцага” цол олгох асуудал орхигдсон нэмэхээр заажээ.
Хуулийн төслийг УИХ-аар хэлэлцэхийг дэмжин анхны хэлэлцүүлэгт бэлтгүүлэхээр холбогдох байнгын хороонд шилжүүлсэн парламентаар эцэслэн батлахад дөрвөн үе шатыг дамждаг. Баяр наадмын тухай хуульд оруулах нэмэлт өөрчлөлт батлагдсан тохиолдолд 17 бөхөд цол нөхөж олгох юм.
Улсын дээд шүүхийн Ерөнхий шүүгчээр Ц.Цогтыг томилуулах саналыг Ерөнхийлөгчид хүргүүлнэ
Улсын дээд шүүхийн Шүүгчдийн зөвлөгөөн 2026 оны 06 дугаар сарын 03-ны өдөр болж, Ерөнхий шүүгчийг сонгох асуудлыг хэлэлцэв. Улсын дээд шүүхийн Ерөнхий шүүгчид Эрүүгийн хэргийн танхимын тэргүүн, шүүгч Ч.Хосбаяр, Захиргааны хэргийн танхимын шүүгч Ц.Цогт нар нэр дэвшин, санал хураалтын дүнгээр шүүгч Ц.Цогт шүүгчдийн олонхын саналыг авсан тул түүнийг Улсын дээд шүүхийн Ерөнхий шүүгчээр томилуулах тухай саналыг Монгол Улсын Ерөнхийлөгчид уламжлахаар тогтлоо.
Монгол Улсын шүүхийн тухай хуулийн 36 дугаар зүйлийн 36.7-д "Улсын дээд шүүхийн Ерөнхий шүүгчийг Улсын дээд шүүх санал болгосноос хойш Ерөнхийлөгч 14 хоногийн дотор зургаан жилийн хугацаагаар, зөвхөн нэг удаа томилно" гэж заасан. Гэвч өнгөрсөн долоо хоногт Үндсэн хуулийн цэцийн их суудлын хуралдаанаас “УДШ-ийн Ерөнхий шүүгчийг 6 жилийн хугацаагаар зөвхөн нэг удаа томилно” гэсэн заалтын “…зөвхөн нэг удаа…” гэсэн хэсэг Үндсэн хууль зөрчсөн хэмээн үзэж түдгэлзүүлээд байгаа юм.
