Пүрэв гарагт Бостон хотын цэнгэлдэх хүрээлэнд болсон тоглолтын 60 дахь минутад Килиан Мбаппе энэ удаагийн ДАШТ-ий 8 дахь гоолоо оруулсан бол, үүнээс зургаан минутын дараа Усман Дембеле Францын шигшээ багийн ялалтыг баталгаажууллаа.
Энэхүү 2018 оны дэлхийн аваргууд ирэх мягмар гарагт Техас мужийн Арлингтон хотод болох хагас шигшээгийн тоглолтод Испани эсвэл Бельгийн шигшээ багийн аль хожсонтой нь тулахаар болж байна.
Африкийн аваргууд болох Мароккогийн баг Францыг гурав дахь удаагаа дараалан Дэлхийн аваргын финалд үлдэх зорилгод нь томоохон саад учруулна гэж таамаглаж байсан юм. Гэвч Дидье Дешамын шавь нар тоглолтыг бүрэн хяналтандаа байлгаж чадлаа. Мароккогийн баг тоглолтын турш хаалга руу олигтой цохилт хийж чадаагүй бөгөөд зөвхөн 83 дахь минутад Аззедин Унахигийн гүйцэтгэсэн чөлөөт цохилтыг Францын хаалгач Майк Меньян хааж амжсан юм.
Мбаппе энэ тоглолтод гоол оруулснаар Лионель Месситэй гоолын тоогоор тэнцэн түүнээс олон гоолын дамжуулалт өгсөн үзүүлэлтээрээ "Алтан шаахай" (Golden Boot)-ны төлөөх өрсөлдөөнийг тэргүүлж эхэллээ.
Мөн тэд дэлхийн аваргын түүхэн дэх хамгийн олон гоол оруулсан тоглогч болохын төлөө ширүүн өрсөлдөж байна. Өдгөө 27 настай Мбаппе ДАШТ-ий карьертаа 20 гоолтой болсон бол 39 настай Месси 21 гоолтойгоор амжилтыг эзэмшиж байгаа юм.
