Африкийн орнуудад дэмжлэг үзүүлж, тивийн өөрийн хэрэгцээнд шаардлагатай эм, эмнэлгийн бүтээгдэхүүнийг дотоодын үйлдвэрлэгчид илүү ихээр үйлдвэрлэх боломжийг бүрдүүлэхээр ажиллаж байна.
Африкийн орнууд ХДХВ-ийн халдвараас урьдчилан сэргийлэх шинэ үеийн эмийг дотооддоо үйлдвэрлэх чадавхаа хөгжүүлэхэд дэмжлэг авч эхэллээ. Энэ нь гадаадын эм үйлдвэрлэгчдээс хэт хамааралтай байдлыг бууруулах зорилготой юм.
Уганда, Кени болон Өмнөд Африк дахь үйлдвэрлэгчдэд дэлхийн эрүүл мэндийн байгууллага Unitaid-аас дэмжлэг үзүүлж, ХДХВ-ийн халдвараас урьдчилан сэргийлэх бүтээгдэхүүний Африк дахь үйлдвэрлэлийг бэхжүүлэхээр болжээ.
Unitaid-ийн мэдээлснээр дотоодын үйлдвэрлэлийг бэхжүүлснээр эм, эмнэлгийн бүтээгдэхүүний нийлүүлэлтийн сүлжээ илүү тогтвортой, тэсвэртэй болохын зэрэгцээ Африкийн үйлдвэрлэгчид тивийн өөрийн хэрэгцээнд шаардлагатай эмийг үйлдвэрлэхэд илүү чухал үүрэг гүйцэтгэх боломжтой болно.
Энэ хүрээнд анхаарал татаж буй эмийн нэг нь алиматравир (alimatravir) юм. Энэ нь сард нэг удаа амаар хэрэглэдэг, ХДХВ-ийн халдвараас урьдчилан сэргийлэх өртөлтийн өмнөх сэргийлэлт (PrEP) эм бөгөөд одоогоор III үе шатны эмнэлзүйн туршилтад явж байна. Хэрэв зохицуулах байгууллагуудаас зөвшөөрөл авбал уг эм нь одоо хэрэглэгдэж буй өдөр бүрийн амаар хэрэглэдэг PrEP болон удаан хугацааны үйлчилгээтэй тарилгын ретровирусийн эсрэг эмүүд (ARV)-ийн зэрэгцээ ХДХВ-ээс урьдчилан сэргийлэх шинэ чухал хувилбар болж магадгүй.
Дэлхийн Эрүүл Мэндийн Байгууллага 2025 онд ленacапавир (lenacapavir) эмийг хэрэглэх боломжийг өргөжүүлэхийг зөвлөсөн. Энэ нь ХДХВ-ийн эмчилгээ болон урьдчилан сэргийлэлтэд хэрэглэдэг, жилд хоёр удаа тарьдаг удаан хугацааны үйлчилгээтэй ретровирусийн эсрэг эм юм.
Гэвч өнгөрсөн долоо хоногт Рио-де-Жанейро хотод болсон ДОХ-ын бага хурлын үеэр мэргэжилтнүүд санхүүжилтийн таналт нь уг шинэ эмийг хамгийн ихээр хэрэгцээтэй хүмүүст нь хүргэхэд саад болж байна гэж мэдэгджээ.
АНУ-ын эм үйлдвэрлэгч Gilead Sciences компанийн боловсруулсан ленacапавир нь одоо хэрэглэгдэж буй өдөр бүр эсвэл долоо хоног бүрийн урьдчилан сэргийлэх аргыг тогтмол хэрэглэх, хүртэхэд хүндрэлтэй хүмүүст хүрч ажиллах боломжтой учраас ХДХВ-ийн судлаачид болон нийгмийн эрүүл мэндийн салбарын идэвхтнүүдийн дунд ихээхэн хүлээлт үүсгээд байсан юм.
АНУ-ын Ерөнхийлөгч Дональд Трампын засаг захиргаа дэлхийн хэмжээний тусламжийг огцом танасны дараа дэлхий даяар 1700 гаруй ХДХВ-ийн эмчилгээний эмнэлэг, үйлчилгээний цэг хаагдаж, дор хаяж 16 000 эрүүл мэндийн ажилтан ажлын байраа алдсан.
Энэ нь дэлхийн хамгийн том ДОХ/ХДХВ-ийн урьдчилан сэргийлэх хөтөлбөрт ноцтой нөлөөлсөн. Амь насыг аврах тусламж үйлчилгээг хамгаална гэж АНУ амласан боловч зарцуулалт буурч, урьдчилан сэргийлэх хөтөлбөрүүдэд ихээхэн хохирол учирчээ. АНУ-ын санхүүжилтээ хадгалж үлдсэн байгууллагууд хүртэл бэлгийн үйлчилгээ эрхлэгчид зэрэг тусгай хэрэгцээтэй бүлгүүдэд үзүүлдэг зарим үйлчилгээгээ зогсоохоос өөр аргагүй болсон юм.
Дэлхий дээр ХДХВ-ийн халдвартай амьдарч буй хүмүүсийн дийлэнх нь Сахарын цөлөөс өмнөх Африкт амьдардаг боловч тус тивийн эм, эрүүл мэндийн бүтээгдэхүүний хэрэгцээ олон жилийн турш импортоос ихээхэн хамаарч ирсэн.
Unitaid-ийн мэдээлснээр Африкт хэрэглэдэг эмийн идэвхтэй эмийн бодисын бараг бүхэлдээ, мөн бэлэн болсон эмийн ойролцоогоор 70 хувь нь гадаадаас нийлүүлэгддэг байна.
PrEP-ийг тогтмол зөв хэрэглэвэл бэлгийн замаар дамжих ХДХВ-ийн халдвараас 99 хувийн үр дүнтэй хамгаалдаг. Гэхдээ нийгмийн эрүүл мэндийн салбарын мэргэжилтнүүд Африкийн үйлдвэрлэгчид дотооддоо үйлдвэрлэлээ шаардлагатай хэмжээнд хүргэхийн тулд хөрөнгө оруулалт, техникийн мэдлэг, зохицуулалтын дэмжлэг болон баталгаатай зах зээл хэрэгтэй гэж үзэж байна.
Unitaid-ийн Гүйцэтгэх захирал доктор Филипп Дюнтон “Шинжлэх ухааны инноваци эрүүл мэндийн салбарт, ялангуяа ХДХВ-ийн халдвараас урьдчилан сэргийлэхэд туйлын чухал. Инноваци нь эрүүл мэндийн үр дүнг сайжруулахын тулд хүртээмжийг нэмэгдүүлэх төлөвлөгөөтэй хамт явах ёстой” гэжээ.
Тэрээр мөн шаардлагатай газарт нь хямд үнэтэй, чанарын баталгаатай эмийг үйлдвэрлэх чадавх бүрдүүлэх нь энэхүү хүртээмжийн төлөвлөгөөний салшгүй хэсэг гэж хэлсэн аж.
