Олон улсын шатрын холбоо (FIDE)-ноос БНХАУ-ын Засаг захиргааны онцгой бүс Хонконгт рапид болон блиц төрлийн дэлхийн аварга шалгаруулах багийн тэмцээнийг зохион байгуулах гэж байна. Маргааш эхлэх тус тэмцээнд манай улсаас “The MongolZ”, “Алдар” спорт хороо, “Босоо Ноён” баг өрсөлдөхөөр болжээ. Их мастер С.Билгүүн, гавьяат тамирчин, их мастер Б.Мөнгөнтуул нар "Алдар" спорт хорооны багт багтсан бол их мастер Д.Батсүрэн тэргүүтэй шатарчид “The MongolZ” багийг бүрдүүлжээ. Мөн 2000 хүртэлх чансаатай сонирхогчдын ангилалд ФИДЕ мастер Б.Хүслэнзаяа, спортын мастер А.Золжаргал нарын зургаан шатарчин “Босоо Ноён” багт тоглоно.
Дэлхийн аварга шалгаруулах багийн тэмцээн нь орчин үеийн шатрын ертөнцийн хамгийн өрсөлдөөнтэй, үзүүштэй тэмцээний нэг бөгөөд дэлхийн өнцөг булан бүрээс шилдэг их мастерууд, үндэсний шигшээ багууд, мэргэжлийн клубүүдийг нэг дор цуглуулдгаараа онцлогтой. Энэ нь шатрын спорт дахь багийн нэгдэл, стратегийн ур чадвар, өрсөлдөөний дээд түвшнийг илтгэдэг онцгой ач холбогдолтой тэмцээн юм. Богино хугацааны хяналттай рапид, блиц төрлөөр явуулдаг тул тоглолт бүр хурд, ур чадвар, багийн нягт уялдаа холбоог сорьсон оюуны тулаан болно.
Уг тэмцээнд манай гурван багаас гадна Монголын шатрын холбооны ерөнхийлөгч Г.Занданшатар Германы тэрбумтан Вадим Розенштайны урилгаар “WR Chess”-ийн бүрэлдэхүүнд багтаж ДАШТ-д өрсөлдөнө. Энэхүү багт дэлхийн №1 их мастер Магнус Карлсен тэргүүтэй Фабиано Каруана, Уэсли Со, Максим Вашье-Лаграв, Хоу Ифань, Александр Костенюк нарын шилдэг мастерууд багтаж байгаа билээ.
Рапид болон блиц төрлийн дэлхийн аварга шалгаруулах багийн тэмцээн маргааш эхэлж, энэ сарын 22-нд өндөрлөнө.
