Бразилын цагдаагийн Рио дэ Жанейро хотод явуулсан ажиллагааны үеэр дор хаяж найман хүн амиа алдсан бөгөөд энэ нь ядуусын фавела хорооллуудад явагддаг цуст ажиллагааны үргэлжлэл болж байна.
Бразилын цагдаагийн байгууллагын мэдээлснээр өчигдөр (2026.03.18) явуулсан уг ажиллагааны үеэр хүчирхэг гэмт бүлэглэл болох Командо Вермельо буюу “Улаан команд” бүлгийн удирдагч Клаудио Аугусто дос Сантос амиа алджээ.
Цэргийн цагдаагийн дарга Марселу Менезес Ногейра хэлэхдээ уг ажиллагаа “томоохон зэвсэгт мөргөлдөөн”-д хүрсэн гэжээ. Дос Сантос болон өөр зургаан сэжигт этгээд буудуулж нас барсан бөгөөд нэг орон нутгийн иргэн барьцаанд байсны дараа буудалцааны үеэр тэнсэн суманд өртөн амиа алдсан гэж мэдээлжээ.
Орон нутгийн гэрчүүдийн хэлснээр Командо Вермельо бүлэгтэй холбоотой хүмүүс хариу арга хэмжээ авч, замуудыг хааж, автобус шатаасан байна. Цагдаа нар таван хүнийг сүйтгэх хэрэг үйлдсэн хэрэгт сэжиглэн баривчилсан байна. Ойролцоогоор 150 цэргийн цагдаа уг ажиллагаанд оролцсон бөгөөд Праэзерес, Фаллет, Фогуэтейро, Короеа, Эскондидино, Паулa Рамос зэрэг дүүргүүдэд явуулжээ.
Дос Сантос нь Праэзерес фавелад хийгддэг хар тамхины наймаатай холбоотой байсан бөгөөд түүнийг баривчлах 10 захирамж гарсан байсан гэж хэвлэлүүд мэдээлсэн байна. Мөн түүнийг Итали жуулчин Роберто Бардэллагийн амийг хөнөөсөн хэрэгт холбогдуулан буруутгаж байжээ.
Энэ удаагийн ажиллагаа нь өнгөрсөн аравдугаар сард Комплексо да Пеня фавелад явуулсан ажиллагааны дараа болж байгаа бөгөөд тухайн үед 130 гаруй хүн амиа алдсан нь төрийн аюулгүй байдлын байгууллагуудын арга барилд эргэлзээ төрүүлсэн юм. Ерөнхийлөгч Луис Инасио Лула да Силва тухайн ажиллагааг “хядлага” гэж шүүмжилж байв.
Бразилын зүүний зарим улс төрчид энэ ажиллагааг цагдаа болон зохион байгуулалттай гэмт хэрэгтнүүдийн хоорондын хяналтгүй мөргөлдөөний үргэлжлэл хэмээн шүүмжилжээ.
Рио-де-Жанейрогийн мужийн депутат Рената да Силва Соуза цахим сүлжээнд “Рио-де-Жанейрод дахин нэг айдас, үймээний өдөр боллоо” хэмээн нийтэлсэн юм. Тэрээр цааш нь “Энэ бүхэн цагдаа нарын бэлтгэл дутмаг байгаагийн илрэл. Морро до Праэзерест ажиллагаа явуулахдаа хариу үйлдлийг тооцоогүй. Үр дүн нь урьдчилан тодорхой байсан. Оршин суугчид буудлагын дунд орж, гудамжууд хаагдан, автобус шатсан” гэжээ.
Соуза мөн иргэдийн амьдралд учруулсан хохирол болон олон хүн амиа алдсан асуудлаар прокурорын байгууллагад албан ёсны гомдол гаргасан байна.
Харин барууны чиг баримжаатай улс төрчид гэмт хэрэгтнүүдийн эсрэг илүү хатуу хүч хэрэглэхийг уриалжээ.
Рио-де-Жанейро мужийн захирагч Клаудио Кастро олон нийтийн сүлжээндээ “Эдгээр гэмт хэрэгтнүүд ямар ч холбоогүй хүмүүст учруулж буй хор хохирол үнэхээр жигшмээр. Ийм харгис үйлдлүүдийн улмаас төр ухрах эрхгүй болдог. Бид цагдаа болон хууль сахидаг иргэдийн талд хатуу зогсоно” гэж бичсэн байна.
Хэвлэлүүдийн мэдээлснээр Бразилын засгийн газар Доналд Трампын засаг захиргааг Командо Вермельо зэрэг бүлгүүдийг “гадаадын террорист байгууллага” гэж ангилахыг нь болиулахыг оролдож байгаа аж. Энэ тодорхойлолтыг өмнө нь АНУ-ын үндэсний аюулгүй байдалд заналхийлдэг бүлгүүдийг тодорхойлоход ашигладаг байсан бол сүүлийн үед Трампын засаг захиргаа Латин Америк дахь гэмт бүлэглэл, хар тамхины картелуудыг ч энэ ангилалд оруулж эхэлсэн бөгөөд ингэснээр Аль-Каида зэрэг байгууллагуудтай адил ангилалд багтана гэсэн үг юм.
Шүүмжлэгчид “гадаадын террорист байгууллага” гэсэн ангиллыг Латин Америкт гэмт бүлэглэлүүдийн эсрэг цэргийн арга хэмжээ авахыг зөвтгөхөд ашиглаж байна гэж анхааруулж байна.
