МАН-ын Удирдах зөвлөл өргөтгөсөн бүрэлдэхүүнээр буюу Бодлогын зөвлөлтэйгээ хуралдахаар гишүүд нь цуглаж байна. Бодлогын зөвлөл гэдэг нь намын дарга, ерөнхий нарийн бичгийн даргаар ажиллаж байсан хүмүүсээс бүрддэг. Тус зөвлөлийн гишүүн, Ерөнхий сайд бөгөөд МАН-ын дарга асан С.Баяр хуралдаа оролцохоор иржээ.
Тэрээр "Хөдөө байж байгаад хурлын зар аваад ирлээ. Би улс төрийн урсгалаас хол байгаа хүн. Гэхдээ Бодлогын зөвлөлийн гишүүн учраас хуралдаа ирлээ.
Би хуваагдаад байгаа хоёр талыг эвлэрүүлэхээр хичээл зүтгэл гаргасан. Бүтэж өгөхгүй байна. Санаа зовмоор юм болж байна шүү дээ. Нэг намын асуудал цаашаа хальсаар төрийн хямрал боллоо. Сүүлдээ Үндсэн хуулийн цэц ч оролцлоо. Одоо үүссэн асуудлыг улс орны эрх ашиг, аюулгүй байдалд хохиролгүйгээр шийдэх ёстой.
Улс төрийн нам гэдэг бол хүмүүсийн нэгдэл. Хүмүүс байгаа газар асуудал байдаг. Миний үед ч санал зөрөлдөх зүйлс гардаг л байсан. Гэхдээ өнөөдрийнх шиг зүйл болж байсныг мэдэхгүй байна" гэв.
