Криптовалютын Binance бирж Украинд хандив цуглуулах кампанит ажилд мөнгө шилжүүлсэн талаарх мэдээллийг Оросын мөрдөн байцаагчдад өгсний дараа Оросын цэргийн шүүх мэдээллийн технологийн мэргэжилтэнд “терроризмыг санхүүжүүлсэн” хэргээр 13 жилийн хорих ял оноожээ.
Баруун тойргийн цэргийн хоёрдугаар шүүх даваа гарагт 49 настай Юрий Беленкийг гэм буруутайд тооцож, гурван жилийн хорих ял, дараа нь чанга дэглэмтэй хорих колонид 10 жил хорих ял оноосон талаар шүүхийн мэдэгдэлд дурдсан байна.
Оросын төрийн мэдээллийн ТАСС агентлагийн мэдээлснээр, Беленкий нь DiHouse компанийн мэдээллийн технологийн газрын захирлаар ажиллаж байсан бөгөөд прокурорууд түүнд 14 жилийн хорих ял оноох хүсэлт гаргажээ. Түүнчлэн түүнийг 500 мянган рубль буюу 6300 ам.доллароор торгосон байна.
Болгар улсад оршин суух зөвшөөрөлтэй Беленкий өнгөрсөн оны есдүгээр сард Москвад зочлохоор нисэж ирэх үедээ баривчлагджээ. Тэрбээр өөрт нь тулгасан буруутгалыг няцаан өмгөөлөгчид нь шүүхийн шийдвэрийг давж заалдахаар болсон гэж ТАСС мэдээлэв.
РИА Новости агентлагийн мэдээлснээр, шүүх Беленкийг 2022 оны наймдугаар сараас 2024 оны гуравдугаар сарын хооронд нийт 120 мянган рублийн дүнтэй 15 удаагийн криптовалютын гүйлгээ хийж, Украины зэвсэгт хүчин болон Орос улс “террорист” байгууллага гэж үздэг “Азов” батальоныг санхүүжүүлсэн гэж дүгнэжээ.
Тэрбээр Кремлийг шүүмжилдэг, Оросоос дүрвэн гарсан сэтгүүлч Аркадий Бабченкогийн нийтэлсэн төлбөрийн мэдээллийг ашигласан байна. Мөн Беленкийг Оросын санхүүгийн хяналтын байгууллагын “террористууд болон хэт даврагчдын” жагсаалтад оруулсан гэж РИА Новости мэдээлжээ.
Reuters агентлагийн олж үзсэн Оросын хууль сахиулах байгууллагын баримт бичгүүдээс үзэхэд, Binance бирж Оросын талын хүсэлтийн хариуд Беленкийн гүйлгээний түүхийг мөрдөн байцаагчдад өгсөн аж. Эдгээр баримт нь түүнийг эрүүгийн хэрэгт татан яллахад чухал үүрэг гүйцэтгэснийг мөн харуулжээ.
ОХУ-д улс төрийн зорилготой байж болзошгүй эрүүгийн хэрэгт холбогдсон хүмүүст тусалдаг “Нэгдүгээр хэлтэс” хүний эрхийн байгууллагын хуульч Евгений Смирнов Reuters агентлагт “Binance-ээс ирүүлсэн хариу нь Беленкийн эсрэг эрүүгийн хэрэг үүсгэн шалгаж, яллахад ашигласан гол нотлох баримт болсон” гэж хэлжээ.
Гэвч шүүх хурлын үеэр өмгөөлөгчид уг мэдээллийг үнэхээр Binance биржээс гаргасан эсэхэд эргэлзэж байгаагаа илэрхийлсэн байна. Учир нь тус бирж 2022 оноос хойш Оростой хамтран ажиллаагүй гэж өмгөөлөгчид үзэж байгааг ТАСС мэдээлжээ.
Binance нь Орос Украинд бүрэн хэмжээний довтолгоо эхлүүлж, үүний дараа барууны орнууд Москвагийн эсрэг хориг арга хэмжээ авсны дараа буюу 2023 онд Оросын зах зээлээс гарсан.
“Нэгдүгээр хэлтэс” байгууллага саяхан гаргасан тайландаа, 2025 онд ОХУ-ын эх орноосоо урвах болон тагнуул хийсэн хэргээр үүсгэсэн нийт эрүүгийн хэргийн ойролцоогоор 10 хувь нь Украины байгууллагуудад хандив өгсөнтэй холбоотой байсан гэж дурджээ. Тус байгууллагын мэдээлснээр, Оросын эрх баригчид банкны шилжүүлгээс гадна криптовалютын гүйлгээг хянаж, 2022 онд хийсэн хандивтай холбоотой хэргүүдийг одоо хүртэл шинээр үүсгэн шалгаж байгаа аж.
