Сэлэнгэ, Өвөрхангай, Дорнод аймагт хээрийн түймэр гарчээ.
Сэлэнгэ аймгийн Мандал сум тавдугаар багийн “Зүрх хүзүү” гэдэг газар ойн гал түймэр гарчээ. Энэ тухай дуудлагыг тавдугаар сарын 6-ны өдрийн 14:10 цагт хүлээн авсан. Тус аймгийн Онцгой байдлын газрын 19 дүгээр ангийн алба хаагчид орон нутгийн иргэд нийт 58 хүн, зургаан автомашинтай ойн гал түймрийг унтраах ажиллагааг зохион байгуулан ажиллажээ. Улмаар тавдугаар сарын 7-ны өдрийн 10:30 цагт цурамд оруулан, тавдугаар сарын 7-ны өдрийн 21:20 цагт бүрэн унтраасан байна. Урьдчилсан байдлаар ойн гал түймэрт 60 га орчим талбай өртөж шатжээ.
Өвөрхангай аймаг, Бат-Өлзий сум “Хашаат” гэдэг газар ойн гал түймэр гарч байна гэсэн мэдээллийг тавдугаар сарын 7-ны өдрийн 16:21 цагт хүлээн авсан байна. Тус сумын Мэргэжлийн анги, орон нутгийн иргэд нийт 105 хүн, 15 автомашин, 29 мотоциклтой ойн гал түймрийг унтраах ажиллагааг зохион байгуулан ажиллажээ. Тавдугаар сарын 7-ны өдрийн 17:40 цагт цурамд оруулан мөн өдрийн 18:40 цагт бүрэн унтраажээ. Урьдчилсан байдлаар ойн гал түймэрт 0.1 га талбай өртөж шатсан.
Дорнод аймаг, Хөлөнбуйр сумын “Хулстай” гэдэг газар хээрийн гал түймэр гарсан тухай дуудлагыг тавдугаар сарын 7-ны өдрийн 13:20 цагт хүлээн авсан байна. Тус аймгийн Хөлөнбуйр сумын Мэргэжлийн ангийн ажилтанууд, хоёр автомашинтай хээрийн гал түймрийг унтраах ажиллагааг зохион байгуулан ажиллажээ. Улмаар тавдугаар сарын 7-ны өдрийн 15:25 цагт цурамд оруулан мөн өдрийн 17:50 цагт бүрэн унтраасан байна. Тус сумын Байгаль орчны хяналтын улсын байцаагчид хүлээлгэн өгсөн. Урьдчилсан байдлаар хээрийн гал түймэрт 50 га талбай өртөж шатжээ.
Дорнод аймаг, Халхгол сумын “Сангийн далай” гэдэг газар хээрийн гал түймэр гарсан тухай дуудлагыг тавдугаар сарын 7-ны өдрийн 15:40 цагт хүлээн авсан байна. Тус аймгийн Матад суманд хөдөлгөөнт эргүүлийн үүрэг гүйцэтгэж байсан Дорнод аймгийн Онцгой байдлын газар, Халхгол суманд хөдөлгөөнт эргүүлийн үүрэг гүйцэтгэж байсан Дорноговь аймгийн Онцгой байдлын газрын алба хаагчид, Дархан цаазат газруудын Дорнод хамгаалалтын захиргааны ажилтанууд орон нутгийн иргэд нийт 33 хүн, тав автомашин, нэг трактортой хээрийн гал түймрийг унтраахаар ажиллажээ. Ийнхүү тавдугаар сарын 7-ны 18:50 цагт цурамд оруулан мөн өдрийн 19:50 цагт бүрэн унтраасан байна. Урьдчилсан байдлаар хээрийн гал түймэрт 800 га талбай өртөж шатжээ.
