Улс төрд үүсээд буй нөхцөл байдалтай холбоотойгоор МҮХАҮТ болон бизнесийг дэмжигч байгууллагууд, салбарын холбоод хамтран мэдээлэл хийлээ.

Энэ үеэр МҮХАҮТ-ын ерөнхийлөгч Б.Лхагважав " Улс төрийн зөрчил, хямрал болоход хувийн хэвшлийн аж ахуйн нэгжүүдийг гүтгэж, цоллодог байдал хэрээс хэтэрлээ. Өнөөдөр нэг намын дотоод зөрчил улс төрийн институци хоорондын зөрчил болж байна. Улсдаа татвар төлөн, 1.1 сая хүнийг ажил орлоготой болгож ДНБ-ий 76-80 хувийг үйлдвэрлэж байгаа аж ахуйн нэгж, хувийн хэвшил, баялаг бүтээгч иргэдэд огт буруу байхгүй. 

Институци хоорондын энэ зөрчил хоёрхон зүйлээс үндэстэй гэж үзэж байна. Улс төрийн эрх мэдэл олж авсан этгээдүүд улсын өмчийг түр зуурын эзэмшилд байлгаад үе солигдсоны дараа эзэмшил хоорондын зөрчил болгодог нь төрийн өмчийг хуулиар хамгаалаагүй 30 жил явсны сөрөг үр дагавар. Мөн төр нийтийн санхүүг Үндсэн хуулиар хамгаалаагүй явж ирснийг далимдуулж албан тушаалтнууд өөрийн өмч мэт дураараа дургиж байна.

 Европын холбооны 27 улсын 60 гаруй төлөөлөгч ирж оролцох хөрөнгө оруулалтын чуулган ирэх долоо хоногт болох гэж байхад манай төр засгийн байдал ийм байна. Хувийн хэвшлийнхэн хөрөнгө оруулагчидтай хамтран ажиллахад бэлэн болсон ч төр засаг нь баталгаагүй. Түүнчлэн татварын багц хууль, Хөрөнгө оруулалтын хууль, Эдийн засгийн эрх чөлөөний хуулийг улсын төсвийн дараа хэлэлцэхээр хүлээгдэж байна. Эдийн засгийг сааруулж, гадаад дотоодын хөрөнгө оруулалтыг хойш татах байдал үүсэх учраас төр нь төрөөрөө, бизнес нь бизнесийн зарчмаараа явмаар байна" 

 Монголын Уул уурхай үндэсний ассосацийн гүйцэтгэх захирал Г.Эрдэнэтуяа "Татварын хүнд нөхцөл, хууль эрх зүйн тодорхойгүй байдалд ажиллаж байгаа аж ахуйн нэгжүүдийн байдал улам хүнд болж, хөгжил нь 5-10 жилээр ухарч байна. Шударгаар хөдөлмөрлөж байгаа хэдэн мянган уурхайчныг жинхэнэ хулгайчид нь хулгайч гэж зарлаад байгаа нь харамсалтай. Сүүлийн 30 гаруй жил адлагдаж ирсэн уул уурхайн салбарынхны хийсэн ажил илхэн. Гэтэл үр ашиггүй төрийн өмчийг хувьчилна гэхээс илүүтэй хувийн хэвшлийг төрд авна гэж байгаа нь харамсалтай" 

Бизнесийн салбар, хувийн хэвшлийн нэр хүндэд халдах, бизнесийн үйл ажиллагааг улс төрийн өнцгөөс дүгнэх хандлага газар авч байгааг эсэргүүцэн дараах мэдэгдлийг гаргажээ.