УИХ дахь МАН-ын бүлэг ээлжит хурлаа хийлээ. Тус намын бүлэг энэ удаагийн хурлаараа Ерөнхийлөгчийн сонгуулийн тухай хуульд өөрчлөлт оруулах тухай хуулийн төсөл, татварын хуулийн төслүүдийг хэлэлцжээ. Мөн Ерөнхий сайд бүлгийн хуралд оролцож мэдээлэл өгчээ.
МАН-ын бүлгийн дарга Ж.Батжаргал "Ерөнхий сайд зургаадугаар сараас дизель түлшний үнэ буурч магадгүй гэсэн мэдээлэл өгсөн. Орон нутгийн удирдлагын асуудал бол намын бүлгээр хэлэлцдэг асуудал биш. Ерөнхий сайд мэдээлэл хийхдээ Нийслэлийн Засаг даргыг огцруулсан гэдгээ хэлсэн. Энэ бол Ерөнхий сайдын бүрэн эрхийн асуудал"гэв.
УИХ-ын гишүүн Д.Бум-Очир "УИХ-ын гишүүн Д.Амар, Ж.Золжаргал, Ж.Баярмаа гишүүнтэй хамтраад Сонгуулийн тухай хуульд өөрчлөлт оруулах тухай хуулийн төсөл өргөн мэдүүлсэн. Энэ хуулийн төслийн агуулга нь сонгогчдын сонгох эрхийг хангах агуулгатай. Судалгаагаар 240 орчим мянган иргэний сонгох эрх зөрчигддөг гэсэн дүн мэдээ бий. Уул уурхайд ажиллаж байгаа, гадаадад амьдарч байгаа иргэд, оюутнууд, сонгуулийн зохион байгуулалтад ажиллаж байгаа хүмүүс гээд олон тооны хүмүүс сонгох эрхээ эдэлж чаддаггүй. Тиймээс эдгээр хүмүүсийн сонгох эрхийг нээж хаана ч байсан хамгийн ойрын хэсгийн хороондооо саналаа өгч болдог тогтолцоог хуульчлахаар тусгасан" гэлээ.
