Хаан Чарльз III, Хатан Камилла нар АНУ-д дөрвөн өдрийн төрийн айлчлалаа эхлүүллээ.
Тэд Эндрюсийн Агаарын хүчний баазад газардаж, Цагаан ордонд очиход ерөнхийлөгч Доналд Трамп, тэргүүн хатагтай Меланиа Трамп нар угтан авчээ.
Бямба гарагт Вашингтонд Ерөнхийлөгч оролцсон арга хэмжээний үеэр буудалцаан болсон тул хамгаалалт маш өндөр түвшинд байна.
Хаан Чарльз Мягмар гарагт АНУ-ын Конгресст илтгэл тавих бөгөөд тэрээр уг халдлагад эмгэнэл илэрхийлэхийн зэрэгцээ олон улсын хүнд нөхцөлд ардчилсан үнэт зүйлсийг хамгаалахын тулд хамтран ажиллах шаардлагатайг онцлохоор төлөвлөжээ. Тэрээр АНУ, Их Британийн хооронд санал зөрөлдөөн байгаа ч “манай хоёр улс нэгдэж чадсаар ирсэн” гэж хэлэх аж.
Илтгэлдээ АНУ–Их Британийн түншлэлийг “эвлэрэл, шинэчлэл”-д уриалж, тэвчээр, эрх чөлөө, тэгш байдлын нийтлэг үнэт зүйлсийг хамгаалахыг онцолно. Мөн НАТО-г дэмжих, Украиныг хамгаалах зэрэг асуудлыг хөндөх төлөвтэй байна.
Хаан трансатлантын холбоо нь “өгөөмөр сэтгэл, энэрэнгүй байдлыг дэмжих, энх тайвныг ахиулах, харилцан ойлголцлыг гүнзгийрүүлэх” үнэт зүйл дээр суурилдаг гэдгийг онцлох байх гэж таамаглаж байна.
Цагаан ордонд Хаан, Хатан хоёр Трампын гэр бүлтэй уулзаж, цай уун, шинээр өргөтгөсөн зөгийн үүрийг үзсэн байна. Энэ нь зөгий үржүүлэхийг дэмждэг Хаанд зориулагдсан дипломат дохио гэж үзэж байна.
Төрийн айлчлал нь АНУ тусгаар тогтнолоо тунхагласны 250 жилийн ойтой давхцаж байгаа бөгөөд Их Британийн зүгээс “зөөлөн хүч”-ний дипломат арга хэрэгсэл болгон харилцааг бэхжүүлэх зорилготой юм.
Хатан Камилла АНУ, Их Британийн тугийг хослуулсан энгэрийн тэмдэг зүүсэн нь 1957 онд Нью-Йоркийн захирагчийн өгсөн бэлэг аж. Энэ нь Суэцийн хямралын дараах харилцааг сэргээх айлчлалтай холбоотой бэлгэдэл юм.
Вашингтонд болсон цэцэрлэгийн хүлээн авалтад 600 гаруй хүн оролцож, улс төр, шинжлэх ухаан, буяны байгууллага, цэргийн салбарын төлөөлөл багтжээ. Хатан Камилла гэр бүлийн хүчирхийллийн эсрэг ажилладаг байгууллагуудын төлөөлөлтэй уулзаж, энэ асуудалд анхаарал хандуулсан байна.
Мягмар гарагт Цагаан ордны ёслолын хүлээн авалтын дараа Хаан Конгресст илтгэл тавина. Энэ нь 1991 онд Хатан хаан Элизабет II ийм илтгэл тавьснаас хойшхи анхны тохиолдол юм.
Цагаан ордонд болох төрийн зоог дээр Трамп мөн илтгэл тавих бөгөөд АНУ, Их Британийн улс төр, нийгмийн төлөөллүүд оролцоно.
