Персийн шинэ жил Наурыз нь уламжлалаараа гэр бүл, шинэ эхлэл, сэргэлтийг бэлгэддэг баяр бөгөөд хаврын өдөр шөнийн тэнцлийн үеэр тэмдэглэгддэг.

Гэвч энэ жил олон иранчуудын хувьд баярын уур амьсгал үгүй болжээ. АНУ болон Израилийн тасралтгүй довтолгоо, олон мянган хүний амь нас, дэд бүтцийн сүйрлийн дунд Ираны иргэд Наурызыг огт өөр нөхцөлд угтаж байна.

Техранд бэлтгэл үргэлжилж, захууд бараагаар дүүрэн, Хиасинт цэцгийн үнэр гудамжаар тархжээ. Гэхдээ олон гэр бүл дотны хүмүүсээ алдаж, гэмтэж бэртсэн төдийгүй сэтгэл санаа, бие махбод, эдийн засгийн хувьд ч таагүй байдалтай байгаа юм.

Энэ жилийн Наурыз зөвхөн дайнаас гадна эдийн засгийн хямралд нэрвэгдэж байна. Өндөр инфляц, ажилгүйдэл, олон жилийн хориг арга хэмжээ болон засгийн газрын бодлогын алдаанаас үүдэлтэй хүнд нөхцөл байдал өнгөрсөн оны 12 сард улс даяар эсэргүүцлийн жагсаалд хүргэсэн бөгөөд хүчний байгууллагуудын хатуу дарамтаар дууссан байна.

Өнөөдөр ч эдийн засгийн нөхцөл сайжраагүй бөгөөд олон иргэдэд энгийн хэрэглээний бараа ч үнэтэй болжээ. Нэгэн иргэн “Бид шинэ жилийг тэмдэглэнэ. Гэхдээ цэцэг, хоол авах нь тансаг хэрэглээ болчихсон. Ирээдүй тодорхойгүй байхад ийм зардал гаргах боломжгүй” гэж ярьжээ.

Наурыз, Рамадан, Эйд зэрэгцэж байна. Энэ жилийн Наурыз нь исламын хамгийн ариун сар Рамаданы төгсгөл болон Эйд ал-Питр  баяртай давхцаж байна. Ираны засгийн газар Рамаданы төгсгөлд зориулсан төрийн залбирлыг зохион байгуулах бөгөөд энэ нь дайн дунд байгаа дэглэмийн хүч нэгдлийг харуулах үйл явдал болох төлөвтэй байна.

Гэвч ихэнх иранчуудын хувьд, ямар шашин шүтлэг, гарал үүсэлтэйгээс үл хамааран Наурызын баяр энэ жил шинэ, өөр утгатайгаар төвд нь оршиж байна.