АНУ болон Саудын Арабын зэвсэгт хүчин Иракийн нутаг дэвсгэр дэх Ираныг дэмжигч зэвсэгт бүлэглэлүүдийн байршилд агаараас цохилт өгсөн нь Ойрхи Дорнодын мөргөлдөөнийг улам даамжруулах эрсдэл үүсгэлээ.
Саудын Арабын тал газрын тосны байгууламжууд руу нь халдсан дроны довтолгооны хариуд уг цохилтыг өгсөн хэмээн мэдэгдсэн. Ингэхдээ АНУ-ын Төв командлалтай хамтран Иракийн нутаг дахь логистик болон зэвсгийн агуулахуудыг онилсон байна. Агаарын цохилтын улмаас Иракийн Ардын дайчилгааны хүчний 20 дайчин амь үрэгдэж, 30 гаруй хүн шархадсан төдийгүй амь үрэгдэгсдийн дунд Ираны цэргийн зөвлөхүүд байсан талаар эх сурвалжууд мэдээллээ.
Тэгвэл Ираны тал газрын тосны байгууламж руу хийсэн халдлагыг Техрантай холбон буруутгаж буйг "тооцооллын алдаа" хэмээн сануулж, АНУ болон Саудын Арабын үйлдлийг Ойрхи Дорнодын дайны хүрээг тэлэх гэсэн оролдлого хэмээн зэмлэн буруушаалаа. Уг цохилтын дараа Ираны Исламын хувьсгалт гварди Иордан дахь АНУ-ын цэргийн бааз руу хэд хэдэн баллистик пуужин харваснаас гадна Ормузын хоолойд стратегийн чухал ач холбогдол бүхий нефть тээвэрлэгч гурван танкерыг замаас нь саатуулснаа мэдэгджээ.
Мөргөлдөөн дахин ширүүссэнээс үүдээд дэлхийн зах зээл дээрх түүхий газрын тосны үнэ дахин 3-5 хувиар огцом өслөө. Үүний зэрэгцээ Иракийн Засгийн газар АНУ болон Саудын Арабын цохилтыг улсынх нь бүрэн эрхт байдалд халдсан үйлдэл хэмээн шүүмжилж, Саудын Арабт хийхээр төлөвлөж байсан Ерөнхий сайдынхаа айлчлалыг тодорхойгүй хугацаагаар хойшлуулжээ.
