Үндэсний их баяр наадмын үеэр Онцгой байдлын байгууллага албаны өндөржүүлсэн бэлэн байдлын зэрэгт ажиллаж байна.
Тодруулбал, Онцгой байдлын байгууллагын хэмжээнд 2026 оны долоодугаар сарын 10-наас 19-нийг хүртэл албаны өндөржүүлсэн бэлэн байдлын зэрэгт шилжин ажиллаж буй.
Нийслэлийн Онцгой байдлын газраас Үндэсний их баяр наадмын арга хэмжээ зохион байгуулагдаж буй Төв цэнгэлдэх хүрээлэн болон Хүй долоон худгийн наадмын талбайд худалдаа, үйлчилгээ, хоол үйлдвэрлэл эрхэлж буй 490 гаруй иргэн, хуулийн этгээдийн үйл ажиллагаанд гал түймрийн улсын хяналтыг хэрэгжүүлэх хяналт шалгалтыг зохион байгуулж байна.
Хяналт шалгалтын хүрээнд алба хаагчид худалдаа үйлчилгээ эрхлэгчид, хуушуурын гэр, хүнсний худалдааны цэгүүдэд галын аюулгүй байдлыг хангах, хийн хангамжийн аюулгүй ажиллагааг мөрдүүлэх чиглэлээр заавар зөвлөмж өгч ажиллажээ.
Шалгалтаар нийт 53 зөрчил илрүүлснээс 18 зөрчлийг газар дээр нь арилгуулан, холбогдох аюулгүй байдлыг хангуулсан байна.
Нийслэлийн Онцгой байдлын газраас наадмын арга хэмжээ үргэлжлэх хугацаанд гал түймэр, ослын эрсдэлээс урьдчилан сэргийлэх хяналт шалгалтыг үргэлжлүүлэн зохион байгуулахыг мэдээллээ.
