УИХ дахь МАН-ын бүлэг ээлжит хуралдаанаараа хэлэлцсэн асуудлуудаа танилцуулж, мэдээлэл хийлээ.
Х.Ганхуяг: -Өнгөрсөн долоо хоногт төсвийн хэлэлцүүлгийн үеэр гишүүдээс зарчмын зөрүүтэй 115 санал гарсан байна. Үүний 76 нь дэмжигдэж, 39 нь дэмжигдсэнгүй. Өнөөдөр буруу ташаа мэдээлэл гарсан. Бид хүүхдийн мөнгөнд огт гарах хүрэхгүй.
Төрийн бүх үйлчилгээг 5.5 их наяд төгрөгт явуулахаар төлөвлөж байсан. Үүний 10 хувийг танаж багш нарын цалинг 30 хувиар нэмнэ. Оны эхэнд 20, долоодугаар сарын 1-нээс 10 хувиар нэмэх саналтай байгаа.
Эрүүл мэндийн албан хаагчдын цалинг 10-15 хувь, тэтгэврийг 8.6 хувиар нэмнэ. Үүнд нийтдээ 1.3 их наяд төгрөг шаарлдлагатай байгаа. Тиймээс шинээр хэрэгжих хөрөнгө оруулалтын төслүүдийн санхүүжилтийг 10 хувь 500 орчим тэрбум төгрөг танахаас өөр арга алга.
УИХ өөрөөсөө эхэлж төсвөө танана. УИХ-ын гишүүдийн дотоод зочин хүлээн авах зардлыг танана, урсгал засвар, эрдэм шинжилгээ судалгааны ажлыг 2025 оны түвшинд барина.
Ж.Батжаргал: -Өнөөдөр МАН-ын бүлгийн хуралд 35 хүн гишүүн оролцсон. Цаашид бүрэн бүрэлдэхүүнээр нь хуралдуулахаар ажиллаж байгаа. Бүлгийн даргын тамга тэмдгээ би аваагүй байгаа. Би үүнд яарахгүй байгаа. 68 гишүүнтэй хурлаа зохион байгуулж ард түмний өмнө хүлээсэн үүргээ биелүүлэхэд эв нэгдлээ хангах нь чухал байна.
