Цаг уурын байгууллагаас өнөөдөр Улаанбаатар, Төв, Сэлэнгэ, Дархан-Уул аймгийн нутаг, Дундговийн хойд хэсгээр ахиухан хэмжээний усархаг бороо орох аюултай үзэгдлээс сэрэмжлүүлэх мэдээллийг гаргаж, урьдчилан сэргийлэх зөвлөмжийг мэргэжлийн байгууллагаас хүргэн ажиллаж байна.

Мөн Улсын онцгой комиссоос бүх шатны онцгой комисс руу чиглэл үүрэг ирүүлжээ. Нийслэл хотын хэмжээнд бөглөрсөн суваг, үерийн ослын дуудлага одоогоор ирээгүй байна. Шүүрт худаггүй хорооллууд болон удаашралтай таталт авч байгаа цэгүүдэд помп ажиллуулж байгаа аж.

Үүнээс гадна нөхцөл байдалтай ОБЕГ-ын Ажиллагааны Шуурхай штабаас төв, орон нутгийн Шуурхай штабтай цахим хурал хийж, мэргэжил, аргазүйн зөвлөмж, үүрэг чиглэлийг өгчээ.

Энэ дагуу:

- Усархаг бороо, үерийн аюултай бүс нутагт иргэдэд сэрэмжлүүлэг, мэдээлэл хүргэх,

- Хашаа, байшинд ус орох эрсдэлтэй бүсийг тогтоож, түр хамгаалалт, суваг шуудууг цэвэрлэх ажлыг зохион байгуулах,

- Ажиллагааны Шуурхай штабууд өндөржүүлсэн бэлэн байдалд ажиллах,

- Шуурхай үед ажиллах алба хаагч, техник хэрэгслийг тодотгох, бэлэн байдлыг хангах чиглэлийн дагуу шуурхай арга хэмжээг хэрэгжүүлэн ажиллаж байна.