Энэ долоо хоногт дотоодод болсон үйл явдлыг тоймлон хүргэе. Дулааны цахилгаан станц-3 дээр онцгой байдлын дэглэм тогтоон засварын ажил хийгдэж байна. Станцын нийт тоноглолын 60 орчим хувийг засварлах ёстой болсон ба тасралтгүй үйл ажиллагаатай, нарийн технологитой, насжилт өндөртэй станц учир техник технологийн саатал гарах болсныг Засгийн газрын онцгой эрхт бүрэн төлөөлөгч мэдэгдлээ. Сэтгэцийн эрүүл мэндийн үндэсний төв/СЭМҮТ/-ийн төлбөртэй тусламж, үйлчилгээний төлбөр удирдлагуудын хувийн дансанд ордог зөрчил илэрчээ. Мөн “Эрүүл монгол хүн” хөтөлбөрийг хэрэгжүүлэх хүний нөөцийн сонгон шалгаруулалт хийхгүйгээр Сэтгэц нийгмийн сэргээн засах төвийн ажилтан гэх 14 иргэнтэй СЭМҮТ-ийн захирал нь хөлсөөр ажиллах гэрээ байгуулсан зэрэг зөрчлүүд гарсныг салбарын сайд нь тайлбарлав. 2025-2026 оны хичээлийн жилд I-V анги 34 долоо хоног, VI-IX анги 35 долоо хоног, X-XII анги 36 долоо хоног тус тус хичээллэнэ. Энэ жил өвлийн амралтын хугацааг нэг долоо хоногоор сунгажээ.
Н.ТАВИНБЭХ: ДЦС-3-ЫН НИЙТ ТОНОГЛОЛЫН 60 ОРЧИМ ХУВИЙГ ЗАСВАРЛАХ ШААРДЛАГАТАЙ
Дулааны цахилгаан станц-3/ДЦС-3/ дээр дахин дэлбэрэлт болсон гэх ташаа мэдээлэлтэй холбогдуулж Засгийн газрын онцгой эрхт бүрэн төлөөлөгч Н.Тавинбэх мэдээлэл хийлээ. Тэрээр засварын ажил бүрэн хийгдэж байгаа боловч нийгэмд гарсан сөрөг мэдээллийг хуулийн байгууллагаар шалгуулна гэв.
Н.Тавинбэх: ДЦС-3 дээр зургаадугаар сарын 2-ны өдөр 50 мегабатын хүчин чадалтай турбин генератор дээр гэмтэл гарсан. Засгийн газраас энэхүү осолтой холбоотой сэргээн босголтын ажлыг эрчимтэй хийж байна. Тус станц дээр онцгой байдал тогтоон засварын ажлыг эхлүүлсэн. Өнөөдрийн байдлаар гүйцэтгэлийн дөрвөн ажил хийхээс хоёрыг нь төлөвлөсөн хугацаанд гүйцэтгэж Улаанбаатар хотын дулаан хангамж, цахилгаан эрчим хүчийг хэвийн хэмжээнд нийлүүлэх боломжтой. Станцад аваар осол гарахад нэгэндээ туслахын оронд бичлэг хийж нийгэмд тараалаа. Бид цаашид хуулийн байгууллагад хандах болно. Станцын нийт тоноглолын 60 орчим хувийг засварлах ёстой болжээ. Олон хүнтэй, тасралтгүй үйл ажиллагаатай, нарийн технологитой, насжилт өндөртэй станц учир техник технологийн саатал багагүй гардаг. Гэмтсэн зуух ашиглалтад ороод 50-аад жил болсон. Ийм төрлийн гэмтэл өмнө нь 15 удаа гарсан. "ДЦС-3"-ын үргүй зардлыг багасгах, худалдан авалттай холбоотой зөрчлүүдийг арилгахаар хатуу арга хэмжээ авч байна. Үйлдвэрийн тоног төхөөрөмжийн гэмтлийг нийгэмд буруу байдлаар мэдээлж байгааг хуулийн байгууллагаар шалгуулна.
Н.ЧИНБҮРЭН: СЭМҮТ-ИЙН УДИРДАХ АЛБАН ТУШААЛТНУУД ХУВИЙН ДАНСААР ТӨЛБӨР АВЧ БАЙСАН НЬ ТОГТООГДЖЭЭ
Эрүүл мэндийн сайд Ж.Чинбүрэн цаг үеийн асуудлаар мэдээлэл хийлээ. Сэтгэцийн эрүүл мэндийн үндэсний төв/СЭМҮТ/-ийн төлбөртэй тусламж, үйлчилгээний талаар иргэнээс АТГ-т гомдол ирүүлсний дагуу шалгалт хийхэд зөрчил байсныг хэллээ. Төлбөртэй тусламж үйлчилгээ авсан иргэнд төлбөр төлсөн баримт өгдөггүй олон зөрчил гарчээ. Үйлчлүүлэгч эрүүл мэндийн байгууллагын данснаас өөр дансанд төлбөр төлөхийг хориглосон журмыг удаа дараа зөрчсөн гэх мэт зөрчлүүд СЭМҮТ-д бий болсныг дурдлаа. 2022-2024 онд цахим бүртгэлд бүртгэгдсэн төлбөртэй тусламж үйлчилгээний орлого болох 527.8 сая төгрөгийн ор хоногийн төлбөрийг иргэдийг цагтаа ирээгүй, эмнэлэгт хэвтээгүй гэж цуцалсан байна. Ийм байдлаар 478.9 сая төгрөгийг цуцлалт хийж, СЭМҮТ-ийн удирдах албан тушаалтнууд бэлнээр болон хувийн данс руу шилжүүлж авсан нь тогтоогджээ. Энэ зөрчил дээр эрүүгийн хэрэг үүсгэн шалгаж байгааг хэллээ. “Эрүүл монгол хүн” арга хэмжээг хэрэгжүүлэхээр 1.3 тэрбум төгрөгийн санхүүжилтийн эрх СЭМҮТ-д энэ оны дөрөвдүгээр сарын 4-ний өдрөөс шилжин ирсэн. Гэвч арга хэмжээний нарийвчилсан төлөвлөгөө болон үйл ажиллагааны удирдамж, төсвийн задаргаа зэргийг тус бүрээр батлаагүй. “Эрүүл монгол хүн” хөтөлбөрийг хэрэгжүүлэх хүний нөөцийн сонгон шалгаруулалт хийхгүйгээр Сэтгэц нийгмийн сэргээн засах төвийн ажилтан гэх 14 иргэнтэй СЭМҮТ-ийн захирал нь хөлсөөр ажиллах гэрээ байгуулсан зэрэг зөрчлүүд илэрчээ.
БОЛОВСРОЛЫН ЯАМ: НЭГ Ч БАГШИЙГ АЖЛААС ХАЛАХГҮЙ
Боловсролын салбарт 4000 хүн цомхотгоно гэх мэдээлэлтэй холбогдуулан Боловсролын яам мэдээлэл өглөө. Боловсролын сайдын зөвлөх Д.Гантулга "Багш нарыг цомхотгоно хална гэсэн ойлголт байхгүй. Монгол Улс даяар 3000 орчим багшийн дутагдалтай байна. Цомхотгол багшаас бусад албан тушаал дээр яригдаж байгаа. Цэцэрлэг, сургууль, МСҮТ-ээс нэг ч багшийг албан тушаалаас нь халахгүй. Цомхотголд боловсролын салбарын удирдлага болох Боловсролын яам, Боловсролын яамны харьяа байгууллагаас орж байгаа. Цомхотгохын тулд цомхотгож байгаа бус чиг үүргийн давхацлын дүн шинжилгээ хийгээд төрийн албаны цомхотголыг хийх гэж байна" гэсэн юм.
Боловсролын яамны Төрийн нарийн бичгийн дарга Х.Батжаргал "Багшийн тоонд гар хүрэхгүй. Сургууль, цэцэрлэгийн албан хаагчдын нийгмийн асуудлыг хөндөхгүй гэж ойлгож болно” гэлээ.
2025-2026 ОНЫ ХИЧЭЭЛИЙН ЖИЛД ГУРВАН УЛИРАЛТАЙ БОЛЖ, ӨВЛИЙН АМРАЛТЫГ НЭГ ДОЛОО ХОНОГООР СУНГАЛАА
Боловсролын яамаас 2025-2026 оны нийслэл болон аймаг, сумын ерөнхий боловсролын сургуулийн хичээлийн жилийн бүтцийг танилцууллаа.
2025-2026 оны хичээлийн жилд I-V анги 34 долоо хоног, VI-IX анги 35 долоо хоног, X-XII анги 36 долоо хоног тус тус хичээллэнэ. Энэ жил өвлийн амралтын хугацаа нэг долоо хоногоор сунгажээ. Бага ангийн сурагчид арванхоёрдугаар сарын 15-аас эхлэн амраад 2026 оны нэгдүгээр сарын 26-д хичээл орно. Харин дунд ангийн сурагчид арванхоёрдугаар сарын 22-оос эхлэн амарч нэгдүгээр сарын 26-д хичээлдээ орно.
Ахлах ангийн сурагчдад амралтын нэг долоо хоногийг цахимаар хичээллэх хуваарьтай болгожээ. Х-XII ангийн сурагчдын цахим сургалт 2026 оны нэгдүгээр сарын 19-өөс 23-ны өдрийг дуустал үргэлжлэх хуваарь гарчээ.
