Роберт Уолдингер болон Марк Шульц нарын “Сайхан амьдрал” ном нь Харвардын их сургуулийн 85 жилийн турш үргэлжилсэн алдарт “Adult Development Study” хэмээх судалгаанд суурилсан бүтээл юм.
Энэ бол дэлхийн хамгийн урт хугацаанд хийгдсэн хүний амьдрал, аз жаргалын талаарх шинжлэх ухааны судалгаа бөгөөд хэдэн зуун хүний амьдралыг үе дамжуулан судалсны үр дүнг энгийн, ойлгомжтой байдлаар уншигчдад хүргэдэг.
Номын хамгийн чухал санаа нь амьдралын үнэ цэн нь эд баялаг, алдар нэр, ажил мэргэжлийн амжилтаар хэмжигдэхгүй, харин хамгийн гол түлхүүр нь хүмүүсийн хоорондын харилцаа гэдгийг баталдаг. Судалгааны дүнгээр нийгмийн халуун дулаан, дэмжлэгтэй харилцаа нь урт наслалт, сэтгэл ханамж, эрүүл мэндийн хамгийн том хүчин зүйл болохыг нотлон харуулжээ.
Мөн зохиогчид бидний өдөр тутмын жижиг сонголтууд хийгээд найз нөхөдтэйгээ уулзах, гэр бүлийнхэнтэйгээ цагийг өнгөрөөх, бусдад туслах гэх мэт зүйлс нь урт хугацаандаа аз жаргалтай амьдралын үндэс болдог хэмээн онцолсон байдаг. Тэдний өгүүлж буйгаар “сайхан амьдрал” гэдэг нь гадна талаас үзэхэд төгс төгөлдөр, амжилттай харагдах бус харин сэтгэлийн дотно холбоо, хүн хоорондын халуун дулаан ойлголцолд суурилдаг ажээ.
Энэ ном нь зөвхөн эрдэм шинжилгээний үр дүн төдий биш, харин амьдралын утга учрыг эрэлхийлж буй хэн бүхэнд практик заавар өгч гүн ухааны эргэцүүлэлд хөтлөх бүтээл билээ. Тиймээс “Сайхан амьдрал” бол орчин үеийн амьдралын түргэн хэмнэлд төөрөлгүй, хүнлэг чанараа хадгалж, аз жаргалтай амьдрахыг хүссэн хэн бүхний заавал унших ёстой номын нэг болсон байна.
Аз жаргалын хамгийн бат бөх үндэс
“Сайхан амьдрал” номын хамгийн чухал дүгнэлтүүдийн нэг бол бидний аз жаргал дан хувь хүний амжилт, эд хөрөнгө, нэр хүндээс хамааралтай бус харин хүмүүс хоорондын сэтгэлийн холбоо дээр үндэслэдэг гэх санаа юм. Найз нөхөд, гэр бүл, хамт олон, бүр танил төдий хүмүүсийн хоорондын харилцаа ч бидний өдөр тутмын сэтгэл хөдлөлд хүчтэй нөлөөлдөг.
Зохиогчид хүний амьдралыг урт хугацаанд ажиглахдаа ганцаардал болон нийгмээс тусгаарлагдсан байдал нь зүрх судасны өвчин, сэтгэл гутрал, богино наслалт зэрэг эрсдлийг нэмэгдүүлдгийг онцолсон. Харин найз нөхөд, ойр дотнынхонтойгоо дотно харилцаа тогтоосон хүмүүс эрүүл мэнд, сэтгэл санаагаар илүү тогтвортой, аз жаргалтай амьдардаг байна.
Эндээс харахад бидний өдөр тутамдаа хийдэг энгийн үйлдэл буюу найз руугаа утасдах, хамт хооллох, гэр бүлийнхэнтэйгээ яриа өрнүүлэх нь үнэндээ урт удаан, сэтгэл хангалуун амьдралын түлхүүр болж чаддаг ажээ.
Ном бидэнд “аз жаргалын том нууц”-ыг хайхаасаа илүүтэйгээр өөрт ойр орших хүмүүсээ эрхэмлэх хэрэгтэйг сануулдаг.
Өдөр тутмын жижиг сонголтууд яагаад чухал вэ?
“Сайхан амьдрал” номд онцолсон өөр нэгэн чухал санаа нь бидний өдөр тутамдаа хийдэг энгийн сонголтууд, зуршлууд урт хугацаандаа хүний аз жаргалд нөлөөлдөгт оршино.
Том амжилт, карьер, эд хөрөнгө хуримтлуулах гэж байнга хөөцөлдөхөөс илүүтэйгээр ойр дотны хүмүүстэйгээ цагийг зөв өнгөрөөх, бусдад туслах, эелдэг харилцаа тогтоох зэрэг энгийн үйлдлүүд ямар хүчтэй болохыг тус номд онцолжээ.
Зохиогчид жишээ татан тайлбарлахдаа, хүмүүсийн өдөр бүрийн энгийн харилцаа буюу дээр дурдсанаар гэр бүлийнхэнтэйгээ өглөөний цай уух, найзтайгаа ярилцах, хамт ажиллаж буй хүнээ урамшуулах нь сэтгэл санааг өөдрөг байлгаж, стрессийг бууруулдаг болохыг онцолжээ. Энэ нь эцэстээ урт наслах, аз жаргалтай амьдрахад бодитой үр нөлөө үзүүлдэг.
Хамгийн үнэ цэнтэй хөрөнгө
Номын гол санааны нэг нь амьдралын үнэт зүйлсийг дахин тодорхойлж өгдөг. Хүмүүс ихэвчлэн амжилт, эд хөрөнгө, нэр хүндээрээ өөрийгөө үнэлдэг боловч судалгааны үр дүнгээс үзэхэд хамгийн үнэтэй “хөрөнгө” нь ойр дотны хүмүүстэйгээ байгуулсан гүнзгий харилцаа, итгэлцэл байдаг.
Тиймээс зохиогчид гэр бүл, найз нөхөдтэйгээ цагийг чанартай өнгөрөөх, харилцаандаа илэн далангүй, халуун дулаан байхыг уриалдаг. Хэдий бага ч гэсэн сэтгэлээсээ илэрхийлсэн анхаарал, халамж нь хүн хоорондын холбоог бататгаж, аз жаргал, эрүүл мэндэд эерэгээр нөлөөлдөг гэдгийг тодотгожээ.
Ойлгож авах практик алхмууд
Ном нь зөвхөн судалгааны үр дүнг дэлгэн үзүүлээд зогсохгүй, уншигчдад амьдралдаа хэрэгжүүлж болох практик зөвлөмжийг өгдөг. Жишээлбэл:
- Өдөр бүр ойр дотнын хүнтэйгээ утсаар ярих, уулзах, яриа өрнүүлэх
- Бусдад туслах, эелдэг үйлдэл хийх, жижиг бэлэг эсвэл захиа бичих.
- Хурц шаардлага, ажлын дарамтнаас түр завсарлаж, гэр бүл, найз нөхдийнхөө хамт цагийг чанартай өнгөрөөх.
- Ганцаардал, стресс мэдэрч байвал найз эсвэл мэргэжлийн хүнтэй зөвлөлдөх.
Эдгээр энгийн алхмууд нь урт хугацаанд сэтгэл ханамж, аз жаргалыг бататгахад томоохон хувь нэмэр оруулдаг.
Роберт Уолдингер, Марк Шульц нарын “Сайхан амьдрал” ном нь амьдралын утга учрыг эрэлхийлж буй хэн бүхэнд гүн ухааны ойлголт, практик заавар өгөх бүтээл.
Эцэст нь хэлэхэд, сайхан амьдрал гэдэг нь зөвхөн гаднаас харахад төгс амжилттай байх бус харин хайр, ойлголцол, халуун дулаан харилцаагаар дүүрэн хүнлэг амьдралд суурилах явдал юм.
Уг номыг уншсанаар уншигч өөрийн амьдралдаа энгийн боловч үнэтэй алхмуудыг хэрэгжүүлж, урт хугацаандаа аз жаргалтай, утга учиртай амьдрах боломжтой болно.