УИХ-ын гишүүн Ц.Сандаг-Очир Ерөнхий сайд Г.Занданшатарыг огцруулах албан бичгийг УИХ-ын дэд дарга Х.Булгантуяад өргөн мэдүүлсэн талаараа мэдээлэл хийлээ.
Тэрээр "МАН-ын даргын сунгаанаас болж намынхаа цагаан байрандаа шийдчих асуудлыг Төрийн ордны цагаан байранд оруулж ирж, төр засгийн ажлыг гацааж байна. Гүйцэтгэх засаглалын тэргүүн өрөөндөө УИХ-ын даргыг алуурчин, авлигачин мэтээр цоллож байгаад гүнээ харамсаж байна. Өнөөдөр сайд дарга нар шүүгч, прокурор, байцаагч болсон байна. УИХ-д 62 гишүүнтэй МАН-ын бүлгийг хоёр хувааж талцуулж буй гол хүн нь Г.Занданшатар. Яагаад ганцхан УИХ-ын даргыг шалгуулах гээд байгаа юм. Өнөөдөр 126 гишүүн дотор нэр цэвэр улсууд хэд байгаа юм. Бүтэн нэртэй, бүлээн цустай хүн байхгүй болж хувирч байна. Олонх нь асуудалтай байгаа. Бүгд шалгуул.
Засгийн газрыг огцруулах албан бичигт 50 гаруй гишүүн гарын үсгээ зурсан. Ил гарахыг хүсэхгүй, саналаа өгөхдөө дэмжсэн кноп дарна гишүүд ч бий. Засгийн газрыг огцруулах асуудлыг өргөн барьснаас хойш гурав хоногийн дотор хэлэлцэж, 10 хоногийн дотор шийдвэрлэх зохицуулалттай. Ирэх баасан гаригт хэлэлцэж эхэлнэ" гэлээ.
