УИХ-ын чуулганы нэгдсэн хуралдаанаар Улсын ерөнхий прокурорын орлогчийг томилох саналыг зөвшилцөх Ерөнхийлөгчийн саналыг хэлэлцэв. 

Улсын ерөнхий прокурорын орлогчоор М.Чинбатыг томилох талаар зөвшилцөхөөр ирүүлсэн Ерөнхийлөгчийн саналыг чуулганы хуралдаанд оролцсон гишүүдийн олонх нь дэмжлээ. УИХ уг саналаа Ерөнхийлөгчид хүргүүлж Ерөнхийлөгч эцэслэн томилдог юм. Үүнтэй холбогдуулан нэр дэвшигчийн товч намтрыг танилцуулъя.

Адуучин сүрэг овогтой, М.Чинбат 1973 онд Сүхбаатар аймагт төрсөн. 52 настай, ам бүл зургаа, эхнэр, хүүхдүүдийн хамт амьдардаг.

1981-1991 онд Сүхбаатар аймагт ерөнхий боловсролын дунд сургууль,

1991-1995 онд Монгол Улсын их сургуулийн Хууль зүйн сургуулийг эрх зүйчээр төгссөн, хууль зүйн ухааны магистрын зэрэгтэй. Төрийн хууль цаазын шадар зөвлөхийн зэрэг дэвтэй юм байна.

1995-2007 онд Сүхбаатар аймгийн прокурорын газарт хяналтын прокурор, аймгийн прокурорын орлогч, аймгийн прокурор,

2007 оноос Багануур дүүргийн прокурорын газарт туслах прокурор, дүүргийн прокурорын орлогч,

2014 оноос Дүүргийн нэгдүгээр прокурорын газарт Тамгын хэлтсийн дарга,

2015 оноос Баянгол дүүргийн прокурорын газарт хяналтын прокурор, Тамгын хэлтсийн дарга,

2017 оноос Чингэлтэй дүүргийн прокурорын газарт ахлах прокурор,

2019 оны хоёрдугаар сараас Улсын ерөнхий прокурорын газарт хяналтын прокурор,

2019 оны дөрөвдүгээр сараас Улсын ерөнхий прокурорын орлогчоор тус тус томилогдон прокурорын байгууллагад прокуророор 30 дахь жилдээ ажиллаж байгаа ажээ.