Судан, Өмнөд Суданы хооронд орших маргаантай Абьей бүс нутгийн захад дроноор цохилт өгсний улмаас түлшний агуулах шатаж, 153 хүн амиа алджээ. Энэ талаар Абьейн захиргааны мэдээллийн сайд Ёханна Акөл Нгорын мэдээлэв. Халдлага Амьет захад болсон бөгөөд гал мягмар гарагт ч үргэлжлэн шатаж байжээ. Тэрбээр амиа алдсан хүний тоо цаашид нэмэгдэх төлөвтэй байгааг дурьджээ.
Суданы армийн өндөр албан тушаалтан даваа гарагт дроноор цохилт өгснөө баталсан байна. Түүний хэлснээр, Өмнөд Суданаас ирж байсан, хагас цэрэгжсэн Шуурхай дэмжлэгийн хүчний (RSF) бүлэглэлд хүргэх зориулалттай түлш тээвэрлэгч машинуудыг онилож байгаа аж. Тэрээр амиа алдсан хүмүүсийг Шуурхай дэмжлэгийн хүчний гишүүд болон түлш хууль бусаар хил давуулдаг этгээдүүд байсан гэж мэдэгдсэн юм. Мөн “Бид энгийн иргэдийг онилдоггүй” хэмээн хэлжээ.
