Засгийн газрын ээлжит хуралдаанаас гарсан шийдвэрийн талаар Байгаль орчин, уур амьсгалын өөрчлөлтийн сайд Ц.Сандаг-Очир мэдээлэл өглөө.
Тэрбээр "Монгол Улсын цөлжилтийн төлөв байдлын судалгааны тайлан эцэслэгдэн гарлаа. 30 гаруй жилийн хугацааны өгөгдөлд суурилж хийсэн. Нийт газар нутгийн 81.9 хувь нь цөлжилтөд ямар нэг байдлаар өртөж эхэлсэн гэсэн дүгнэлт гарсан.
Энэ судалгааны дүн нь цаашид хот хөгжлийн төлөвлөлт, төсвийн хуваарилалт зэрэг төрийн бодлогын суурь болох учиртай. Эрт арга хэмжээ авах тусам цөлжилт, газрын доройтлын асуудлыг шийдвэрлэх боломжтой.
СОР17 хурлын бэлтгэл ажил 95 хувьтай байна. Жижиг тохижилт, цэвэрлэгээ, сургалтын ажлууд үлдсэн. 7800 оролцогч хуралд оролцохоо албан ёсоор бүртгүүлсэн.
Арга хэмжээнд улсын төсвөөс 250 орчим тэрбум төгрөг гаргасан. Хувийн хэвшлүүдээс 20 орчим тэрбумын хандив цугларсан. Хурлын үеэр хөрөнгө оруулалт, төсөл хөтөлбөрийн талаар хэлэлцэж, тодорхой үр дүнгүүд гарна. Иймд бид гаргасан зардлаа хурлын үеэр 100 хувь эргэн нөхнө гэж харж байна.
COP17-н үеэр тог тасрах, үер ус, галын аюул зэрэг асуудлаас сэргийлж бэлтгэл ажлыг хангасан. Байр, байгууламжийг энэ сарын 15-нд НҮБ-ын харуул хамгаалалтад хүлээлгэж өгнө" гэлээ.
