Эрүүгийн цагдаагийн албанаас Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Т.Даваадалайн гэрт өчигдөр орой нэгжлэг хийж, улмаар хойшлуулшгүй ажиллагааны хүрээнд 48 цагийн хугацаатайгаар баривчилсан байна.
Түүний эхнэр Б.Анхтуяагийн нэр дээр бүртгэлтэй “Авангард Уран Дизайн энд Инженеринг” компани Туулын хурдны замын төслийн тендерээс 20 тэрбум төгрөгийн санхүүжилт авсан гэх асуудалтай холбон шалгаж, байцааж эхэлжээ. Мөн төрсөн дүү Т.Мөнхдалай нь “Улаанбаатар метро” төслийг удирдаж буй нь ашиг сонирхлын зөрчил үүсгэсэн байж болзошгүй хэмээн үзэж буй аж.
Баасан гарагт АТГ-аас НИТХ-ын төлөөлөгч Б.Сэргэлэнбаатарын албан өрөөнд нэгжлэг хийж, улмаар түүнийг "Үнэн ба зөв" намын ерөнхий нарийн бичгийн дарга Ш.Мөнхсайханы хамт баривчлан саатуулсан юм. Б.Сэргэлэнбаатар, Ш.Мөнхсайхан нарын хувь эзэмшдэг компани "Сэлбэ дэд төв" төслийн гүйцэтгэгчээр шалгарсан тул албан тушаал, эрх мэдлээ урвуулан ашигласан байж болзошгүй гэдэг үндэслэлээр шалгаж байгаа аж.
Эдгээр үйл явдалтай холбогдуулан хотын дарга Х.Нямбаатар цахим хуудсаар байр сууриа илэрхийллээ. Тэрээр "Намайг тойруулж буудаж байхаар намайг шалга. Албан тушаал, эрх мэдэл солилцдог уг нь хоёр арга бий. Намын хурлаар эсвэл хонгилоор. Мэдээж хоёрдохыг сонгосон бол тойруулж буудаж олон хүн хэлмэгдүүлж байхаар намайг дуудаж шалга" гэв.
