Гаалийн ерөнхий газраас мэдээлснээр манай улсын гадаад худалдааны эргэлт оны эхний долоон сард өмнөх оны мөн үеэс 36.1 хувиар өсөж 19.3 тэрбум ам.долларт хүрчээ. Үүнээс экспорт 12.2 тэрбум ам.долларыг бүрдүүлж, худалдааны ашиг анх удаа 5 тэрбум ам.доллар давсан байна.

Өсөлтийг зэсийн хүдэр, баяжмал болон нүүрс голлон дэмжиж, экспортын орлогын нийт 82.7 хувийг эзэлжээ. Харин боловсруулаагүй газрын тосны экспорт буурч, 1.95 сая баррелийг гаргасан байна.

Импортын хувьд өмнөх саруудын өсөлт харьцангуй саарахад өндөр дүнтэй бүтээгдэхүүн болох автомашин, түүний хослох бүтээгдэхүүнүүдийн импорт буурсан нь нөлөөлжээ. Нийт 52 225 суудлын автомашиныг 607.4 сая ам.доллароор импортолсон нь сүүлийн гурван жилийн ижил хугацааны хамгийн бага дүн болсон байна. Түүнчлэн ачааны 12 156 автомашин импортолсон нь мөн л сүүлийн гурван жилийн хамгийн бага дүн болжээ.

Хэдий тийм боловч дээрх хугацаанд автобензин, дизель түлшний импорт жилийн өмнөхөөс 10-14.8 хувиар тус тус нэмэгдсэн үзүүлэлттэй байна.