Хагас марафоны дэлхийн дээд амжилтын эзэн асан Кибиуотт Кандие допингийн хоёр төрлийн зөрчил гаргасны улмаас 7 жилийн хугацаагаар эрхээ хасуулжээ.
Хөнгөн атлетикийн шударга байдлын нэгж(AIU)-ийн мэдээлснээр 30 настай Кенийн тамирчин Кибиуотт Кандие допингийн шинжилгээ өгөхөөс татгалзсан, допингийн хяналтын үйл явцад хөндлөнгөөс оролцохыг оролдсон гэж буруутгагдсан байна.
AIU-ийн тэргүүн Бретт Клотиер "Ямар ч тамирчин спортын дүрмээс давуу эрхтэй байж болохгүй. Шинжилгээ өгөхөөс татгалзах нь спортын шударга байдлыг эрсдэлд оруулдаг" хэмээн мэдэгджээ.
Анх түүнд нийт 8 жилийн хориг тавихаар төлөвлөж байсан ч буруугаа эрт хүлээн зөвшөөрсөн учраас ялыг нь 1 жилээр бууруулжээ. Түүний эрх хасах хугацааг 2025 оны гуравдугаар сарын 14-нөөс тооцож эхлэх бөгөөд 2032 оны гуравдугаар сарын 13 хүртэл үргэлжлэх аж.
2025 оны гуравдугаар сарын 1-нд Кандие Кени дэх гэртээ хийгдэх байсан гэнэтийн допингийн шалгалтыг "яаралтай төлбөр хийх шаардлагатай" гэж тайлбарлан хойшлуулж, эцэст нь шинжилгээ өгөхөөс татгалзсан юм. Түүний гар утас болон санхүүгийн мэдээлэлд хийсэн шалгалтаар нэгэн сувилагчтай олон удаа холбоо барьсан, мөн шалгалтаас өмнөх 12 сарын хугацаанд 11 удаагийн мөнгөн шилжүүлэг хийсэн нь тогтоогджээ.
Мөн Кандиегийн анхны тайлбарууд худал болох нь тогтоогдож, Кенийн эрх баригчид түүний гаргаж өгсөн зарим бичиг баримт хуурамч байсныг баталгаажуулсан байна.
Хамтын нөхөрлөлийн наадмын хүрэл медальт Кандие 2020 онд хагас марафоны дэлхийн дээд амжилтыг 57 минут 32 секундээр тогтоож байсан нь одоо ч түүхэн дэх хамгийн хурдан гурав дахь тамирчинд тооцогдсоор байгаа билээ.
