Италийн эрх баригчид даваа гарагт Неаполь хотод нэгэн орон сууцанд нэгжлэг хийх үеэр хана, шал, тавилга дотор нуусан 3.2 сая евро буюу 3.6 сая ам.доллар илрүүлжээ. Уг ажиллагааны үеэр 34 хүнийг баривчилсан байна.
Неаполийн Карабинерийн цэргийн цагдаагийн газраас CNN-д өгсөн мэдэгдэлд дурдсанаар, мафийн эсрэг тэмцэх албаныхан Кайвано дахь нэгэн хаягаас 50 еврогийн дэвсгэртээр багцалсан бэлэн мөнгийг илрүүлжээ.
Мөнгөн дэвсгэртүүдийг гялгар уутаар ороож, шал болон ханын хавтангийн доор цэвэрхэн эгнүүлэн өрсөн байв. Түүнчлэн хувцасны шүүгээний нууц шургуулгуудад мөнгө нуусан байсныг цагдаа нар илрүүлэн хуягласан автомашинд ачсан байна.
Цагдаа нар мөн 11 ширхэг тансаг зэрэглэлийн Rolex цаг, галт зэвсэг болон хар тамхи худалдаалахтай холбоотой хэрэгслүүд илрүүлсэн талаараа хэвлэлийн бага хурлын үеэр мэдэгджээ.
Уг нэгжлэг нь Неаполийн мафийн эсрэг прокурор Никола Граттеригийн удирдсан, хэдэн сарын турш үргэлжилсэн нууц ажиллагааны нэг хэсэг аж. “Энэ ажиллагаа ямар ач холбогдолтой байсныг харуулахын тулд хэлэхэд, ердөө нэг орон сууцнаас бид 3.2 сая евро бэлэн мөнгө, мөн өндөр үнэтэй цагнууд хураан авсан” гэж Граттери сэтгүүлчдэд хэлсэн байна.
Прокуроруудад мэдээлэл өгч, хамгаалалтад орсон эх сурвалжуудаас ирсэн мэдээллийн дагуу ажиллагааг эхлүүлжээ. Баривчлагдсан хүмүүс нь Анжелино овгийн гэмт хэргийн бүлэглэлтэй холбоотой гэнэ. Тус бүлэглэл Кайвано хотод маш хүчтэй нэвтэрсэн тул өнгөрсөн онд орон нутгийн захиргааг шүүхийн хяналтад оруулахад хүрсэн гэдэг.
Карабинерийн мэдэгдэлд дурдсанаар, баривчлагдсан 34 хүнийг мафийн хэв маягийн гэмт хэргийн бүлэглэлд нэгдэх, хар тамхины наймаа эрхлэх, бусдыг сүрдүүлэн мөнгө авах, хар тамхийг худалдаалах зорилгоор хадгалах зэрэг хэрэгт сэжиглэж байна.
Мөнгө, галт зэвсэг, цагнуудаас гадна эрх баригчид гэмт хэргийн бүлэглэлийн үйл ажиллагааны арга барилыг мөн илрүүлсэн байна. Граттеригийн тодорхойлсноор тус бүлэглэл “бизнес эрхлэгчийн хэв маягаар” ажиллаж, хар тамхи худалдаалах, бусдыг сүрдүүлэх зэрэг хууль бус үйл ажиллагаагаа явуулахын тулд хүмүүсийг ээлжээр ажиллуулдаг байжээ.
Хураан авсан мөнгийг зохион байгуулалттай гэмт хэргийн хохирогчдод туслах зорилготой улсын “Шударга ёсны санд” шилжүүлнэ.
