Усны газрын дарга З.Батбаяр Туул голын өнөөгийн нөхцөл байдлын талаар мэдээлжээ.
Тэрээр "Өнөөдрийн байдлаар "Наадамчдын гүүр"-ний орчмоос Туул-Дунд голын бэлчир хүртэл, Морин давааны хойд хадан хошуунаас төв цэвэрлэх байгууламжийн хаягдал ус орж ирэхэд хүртэл хоёр ч газарт тасарсан шургасан байдалтай байна. Шалтгаан нь Туул гол ёроолдоо хүртэл хөлдсөн үеэс эхлэн гэсэж хайлах хүртэл таван сарын хугацаанд хоногт 300 000 м³ усыг газрын гүнээс авч Улаанбаатар хотын усан хангамжид ашиглаж байсан. Үүний улмаас хөрсний усны түвшин унаж одоо ус хайлах үед нөхөн сэргэж буй. Мөн Улаанбаатар хот орчимд хаврын гачиг урсацын үеийн тэжээл болдог байсан шар усны үер огт болоогүй нь бас нөлөөлж байна.
2012 онд 45 хоногийн хугацаатай тасалдаж байснаас хойш урт хугацаагаар тасалдахгүй байсан Туул гол ийнхүү харамсалтай байдлаар тасарч шургасан байдалтай байна. Туул голын урсац тасалдсан энэ үед ус ашиглалтыг хязгаарлах, багасгах арга хэмжээ авах шаардлага үүсэж магадгүй юм" гэжээ.
