Засгийн газар 2026 оны төсвийн төслөө УИХ-д өргөн мэдүүлсэнтэй холбогдуулан Ерөнхий сайд Г.Занданшатар мэдээлэл хийлээ.
Г.Занданшатар: -Төсвийн төслийг анх удаа иргэдийн оролцоонд тулгуурлан боловсруулсан.
Хоёрдугаарт, татварын ачааллыг багасгаж бууруулсан төсөв болно. Жижиг, дунд бизнес, иргэдээ дэмжихэд чиглэсэн төсөв боллоо.
Иргэдээс бүх хэлбэрээр саналыг нь авсан. Нийт 201 мянга 100 иргэний саналыг авсан. Төсвийг юунд түлхүү зарцуулах вэ гэсэн асуултад
- 129 мянга 625 иргэн эрүүл мэндийн салбарт,
- 105 мянга 295 иргэн боловсролын салбарт
- 88 мянга 10 иргэн эрчим хүчний салбарт гэж саналаа өгсөн.
Эрүүл мэндийн салбарын хөрөнгө оруулалтыг 5.5 дахин нэмж байгаа. "Хавдар судлалын үндэсний төв-2"-ыг барьж байгуулна. Зүрх, судасны үндэсний төвийг шинээр байгуулна. Гэмтэл, согог судлалын үндэсний төвд их засвар хийнэ. Эд, эс, эрхтэн шилжүүлэн суулгах төв байгуулна. 49.7 тэрбум төгрөгөөр эмнэлгүүдийн тоног төхөөрөмжийг сайжруулна. 19 эмнэлгийг шинээр ашиглалтад оруулна.
Боловсролын салбарын хөрөнгө оруулалтыг хоёр дахин нэмэгдүүллээ. 73 цэцэрлэг, 117 сургууль, 32 дотуур байр, 66.7 тэрбум төгрөгийн тоног төхөөрөмжийг шийднэ.
Нийт иргэдийнхээ татварын ачааллыг бууруулах шинэчлэлийг эхлүүлж байна. НӨАТ-ын тухай хуулийн төслийг төсвийн төсөлтэй хамтад нь өргөн мэдүүлж байгаа. НӨАТ-ын буцаан олголтын хувийг нэмэгдүүлж байгаа. Нэг сая хүртэлх төгрөгийн худалдан авалтад таван хувийн буцаалт олгоно. 2027 оноос 10 хувийг нь буцаан олгоно. 500 мянга хүртэлх худалдан авалтад 10 хувийн буцаалт олгоно. Нийт иргэдийн 75 хувь нь сард нэг сая болон түүнээс доош төгрөгийн худалдан авалт хийдэг. Тэгэхээр энэ шийдвэр нь иргэдийн 75 хувьд ээлтэй.
Иргэдийн сарын 800 мянган төгрөгийн орлогыг хүн амын орлогын албан татвараас 100 хувь чөлөөлнө. 1.5 сая төгрөгийн цалинтай хүн байлаа гэхэд 800 мянган төгрөг нь татвараас чөлөөлөгдөж 700 мянган төгрөгөндөө 10 хувь буюу 70 мянган төгрөгийн татвар төлнө.
2.5 тэрбум хүртэлх орлоготой ЖДҮ эрхлэгчид татварын хөнгөлөлт эдэлнэ.
Хялбаршуулсан горимын босго 50 сая байсныг 400 сая болгож байгаа.
Дансыг нь хааж татвар төлүүлдэг бүдүүлэг зохицуулалтыг хална.
2025 онд төсвийн зарлага 35.1 их наяд төгрөг байсан 32.2 их наяд болгон бууруулж байгаа. Өмнө нь бид тодотголоор 2.3 их наядаар төсвийн үр ашиггүй зардлыг танасан. Үр дүнд нь ДНБ эзлэх урсгал зардал хоёр хувиар буурсан. Алт, нүүрс зэрэг түүхий эдийн ханш өсөхөөр дагаад зардлаа нэмдэг, дараа нь гадаад өрийн дарамт нэмэгддэг байдлыг халж байна.
Төрийн албан хаагчдын тоо 230.9 мянга байсныг 218 мянга болгож төрийн албаны тэлэлтийг хязгаарласан. Цаашид тодотголын дараах энэ түвшинд барина.
Төрийн өмчит аж ахуйн нэгжүүдийг нэгтгэх, татан буулгах ажил үргэлжилнэ. 109 ААН байгааг 87 болгон бууруулна.
Зам, гүүрийг дэмжсэн төсөв болж байгаа. 2000 орчим км зам шинээр барина. 223 км зам, 1317 метр урт гүүр засварлана.
2026 онд эрчим хүчний салбарт 3.9 их наядыг зарцуулж, үйлдвэрлэлийг 3515 МВт-аар нэмэгдэгдүүлж, импортыг 663.4 МВт-аар бууруулна.