Байгаль орчин, уур амьсгалын өөрчлөлтийн сайд Ц.Сандаг-Очир Засгийн газрын хуралдаанаас гаргасан шийдвэрийн талаар мэдээлэл хийлээ. 

Тэрээр "Нийслэлийн агаарын бохирдлыг бууруулах зорилгоор Засгийн газраас Багануурын нүүрсний уурхайг түшиглэн нүүрс-пиролизын үйлдвэр байгуулах шийдвэр гаргалаа. Ингэснээр хагас коксжсон түлшийг дотооддоо үйлдвэрлэж эхэлнэ гэсэн үг. Өнгөрсөн хугацаанд Багануурын уурхайд түшиглэсэн "Хөх нүүрс" төсөл буюу нүүрс-пиролизын үйлдвэр байгуулах ТЭЗҮ боловсруулж дууссан. Өнгөрсөн жил газрын асуудлыг нь шийдвэрлэсэн. Эрдэмтдийн зөвлөлийн хурлаар хэлэлцэн дэмжсэн. Гуравдугаар сард БНХАУ-д хийсэн туршилтын үр дүн сайн гарсан. Цаашид нийслэлийн Засаг даргын Тамгын газар, Чингис хаан үндэсний баялгийн сан тус тусдаа төсөл ярихгүйгээр, Засгийн газраас өгсөн чиглэлийн дагуу энэ үйлдвэрийг байгуулна. Улмаар Багануурын уурхай нүүрсийг түүхийгээр нь гаргах биш, боловсруулах шатлалд шилжиж байна. Дагалдсан давирхайн бүтээгдэхүүн гаргана.

Төслийн нийт санхүүжилт 490 гаруй тэрбум төгрөг. Гуравдугаар улиралд багтааж нийслэлийн Засаг даргын Тамгын газар сонгон шалгаруулалт явуулж төсөл хэрэгжүүлэгчийг тодруулна. Дөрөвдүгээр улирлаас бүтээн байгуулалтын ажлыг эхлүүлэх зорилттой ажиллаж байна. Ингэснээр 2028 оны нэгдүгээр улиралд эцсийн байдлаар үйлдвэрийг ашиглалтад оруулахаар төлөвлөж байгаа. 

Төслийн санхүүжилтийн 20 хувийг Чингис хаан үндэсний баялгийн сан, 10 хувийг нийслэлийн Засаг даргын Тамгын газар, үлдсэн 70 хувийг гадаадын хөрөнгө оруулалт, түншлэлийн хүрээнд зээлээр санхүүжүүлнэ. Үйлдвэр ашиглалтад орсноор Улаанбаатар хотын агаарыг бохирдлыг 50 хувь бууруулах боломж бүрдэхийн зэрэгцээ дотоодоосоо 100 хувь түлшээ хангана" гэв.