Эрүүл мэндийн сайд Ж.Чинбүрэн өнөөдрийн Засгийн газрын хуралдаанд Монголын Эрүүл мэндийн ажилтны Үйлдвэрчний эвлэлийн холбоотой хийж буй хэлэлцээрийнхээ талаар танилцуулжээ. Засгийн газрын хуралдааны дараа энэ талаараа сэтгүүлчдэд мэдээлэл өглөө.
Тэрээр "Өнөөдрийн хуралдаанаар эрүүл мэндийн салбарын ажил хаялттай холбоотой асуудлыг танилцууллаа. 2026 оны нэгдүгээр сараас эмч нарын цалинг 30 хувь нэмнэ. Цаашид үе шаттайгаар 75 хувиар нэмж 2026 ондоо багтааж гурван сая төгрөгт, 2027 онд 3.5 сая төгрөгт хүргэхээр танилцууллаа.
2027 оныг эрүүл мэндийн салбарыг дэмжих жил болгохоор зарласан. Эрүүл мэндийн байгууллагын ажилчдын цалинг нэмэхдээ бусад зардлаа танах, Эрүүл мэндийн даатгалын сангийн орлогыг нэмэгдүүлэх байдлаар санхүүжилтийг нь бүрдүүлэхээр тооцсон. Сахилга батын ажлуудыг хийж 157 тэрбумыг гаргаж, цалинг нэмэгдүүлэхээр шийдвэрлэнэ. Төсвөөс 191 тэрбумыг даатгалын сан руу гаргаж, Даатгалын сангийн зардал 2.1 их наяд болно. Ингээд үргүй зардлаа хэмнэж 157 тэрбумыг цалингийн нэмэгдэл зарцуулах юм.
Одоо байгаа 1.1 саяын үндсэн цалин нэмэгдэж хоёр сая 40 мянга, залуу эмч нарын цалин 1.4 сая байгааг ирэх нэгдүгээр сарын 1-нээс 1.9 сая болгоно.
Бидний зүгээс Эрүүл мэндийн салбарын Үйлдвэрчний эвлэлийн зүгээс гаргасан саналаар нь өчигдөр орой ярьж тохирсон. Энэ саналаа одоо үйлдвэрчний эвлэл рүү явуулах гэж байна" гэв.
