АНУ-ын Ерөнхийлөгч Доналд Трамп Ормузын хоолойг хамгаалахад оролцохыг холбоотон орнуудаасаа шаардсан ч олон улс энэ уриалгыг хүлээн авахаас татгалзлаа.
Тэрээр өөрийн засаг захиргаа долоон улстай холбоо барьж, Ираны хаасан стратегийн чухал усан замыг хамгаалахад оролцоно гэж найдаж байгаагаа мэдэгдсэн. “Эдгээр улсууд өөрсдийн нутаг дэвсгэрийг хамгаалах ёстой. Тэд эрчим хүчээ эндээс авдаг” хэмээн тэрээр сэтгүүлчдэд хэлжээ.
Гэвч Япон, Австрали, Их Британи улс цэргийн хөлөг илгээх төлөвлөгөөгүй гэдгээ илэрхийлсний дараа Герман улс мөн адил байр суурь илэрхийлж, НАТО энэ дайнд оролцох ёсгүй гэж мэдэгдсэн байна.
Германы канцлер Фридрих Мерцийн хэвлэлийн төлөөлөгч “Энэ бол НАТО-гийн дайн биш. АНУ бидэнтэй урьдчилан зөвшилцөөгүй” гэж мэдэгдэв.
Германы Батлан хамгаалахын сайд Борис Писториус мөн АНУ-ын хүсэлтийг няцааж, “АНУ-ын хүчирхэг тэнгисийн цэрэг хийж чадахгүй зүйлийг Европын хэдэн хөлөг онгоц хийж чадах вэ?” гэж шүүмжилжээ.
Японы Ерөнхий сайд Санаэ Такаичи АНУ албан ёсны хүсэлт гаргаагүй бөгөөд цэргийн оролцоо нь хууль эрх зүйн хувьд маш төвөгтэй гэж мэдэгдсэн байна. Япон улс нефтийн нийлүүлэлтийг тогтворжуулахын тулд стратегийн нөөцөөсөө ашиглаж эхэлжээ.
Австрали улс ч мөн адил татгалзсан байр суурь баримталж байна. Тус улсын тээврийн сайд Кэтрин Кинг “Бид Ормузын хоолой руу хөлөг илгээхгүй” гэж тодорхой мэдэгдсэн.
Их Британи агаарын мина цэвэрлэх нисэх төхөөрөмж илгээхийг хэлэлцэж байгаа ч байлдааны хөлөг илгээх нь нөхцөл байдлыг хурцатгаж болзошгүй гэж анхааруулжээ. Ерөнхий сайд Кир Стармер “Бид өргөн хүрээний дайнд татагдан орохгүй” гэж мэдэгдсэн байна.
Европын орнуудын хувьд 2003 оны Иракийн дайны алдааг давтахгүй байх болгоомжлол хүчтэй байна. Италийн Гадаад хэргийн сайд Антонио Таяни “Энэ асуудлыг дипломат замаар шийдэх ёстой” гэж мэдэгдсэн.
Франц улс нэмэлт цэрэг илгээхээс татгалзаж, одоогийн байрлал нь зөвхөн бүс нутгийн тогтвортой байдлыг хадгалах зорилготой гэж мэдэгдсэн. Нидерландын Ерөнхий сайд Роб Йеттен богино хугацаанд амжилттай цэргийн ажиллагаа явуулахад хүндрэлтэй гэж үзжээ.
Люксембургийн дэд ерөнхий сайд Ксавье Беттел “Вашингтоны дарамтад бууж өгөхгүй” гэж мэдэгдсэн бол Грекийн Засгийн газрын төлөөлөгч Павлос Маринакис мөн оролцохгүй гэдгээ илэрхийлсэн.
Харин Данийн Гадаад хэргийн сайд Ларс Лёкке Расмуссен Европ тодорхой хэмжээнд оролцох боломжийг нээлттэй үлдээх ёстой ч гол зорилго нь хурцадмал байдлыг бууруулахад чиглэх ёстой гэжээ.
Европын холбооны гадаад бодлогын тэргүүн Кая Каллас “Энэ бол Европын дайн биш ч Европын ашиг сонирхол хөндөгдөж байна” гэж мэдэгдсэн бөгөөд одоогоор ЕХ-ны “Aspides” ажиллагааны хүрээг өөрчлөх сонирхол байхгүй гэдгийг онцолсон байна.
Өмнөд Солонгос эцсийн шийдвэрээ гаргаагүй бөгөөд АНУ-тай зөвлөлдөж байна. Харин Хятад улс Ирантай нефть, хий тээвэрлэх аюулгүй байдлын талаар хэлэлцэж байгаа тухай мэдээлэл гарчээ. Трамп “Хятад улс Ормузын хоолойгоор дамжин нефтийнхээ 90 хувийг авдаг тул оролцох ёстой” гэж мэдэгдэж, дэмжлэг үзүүлэхгүй бол айлчлалаа хойшлуулж магадгүй гэж анхааруулсан байна.
Гэсэн ч ихэнх улс орон цэргийн оролцоо нь нөхцөл байдлыг улам хурцатгах эрсдэлтэй гэж үзэн татгалзсаар байна.
