Ням гарагийн орон нутгийн цагаар 12:20 цагт Бангкокийн Банг Сью дүүргийн Тао Пун өртөөний ойролцоох Цэнхэр шугамын цахилгаанжуулсан өндөрлөг төмөр замд гал гарчээ.
Гал сөнөөгчид хэдхэн минутын дараа хэргийн газарт хүрч очиход галын дөл болон утаа агаарт суунаглаж байжээ. Аврагчид том оврын агааржуулалтын сэнс ажиллуулж, өртөөний барилга болон төмөр замын орчмын утааг зайлуулсан байна.
Галыг хяналтад авсан бөгөөд ослын улмаас хүн бэртэж гэмтээгүй аж.
MRT-ийн Цэнхэр шугамыг ажиллуулдаг Bangkok Expressway and Metro Plc (BEM) компани MRT-ийн “бүх өртөөнд” үйлчилгээг түр зогсоосноо мэдэгдэв.
Урьдчилсан мөрдөн шалгалтаар цахилгааны удирдлагын шүүгээ хэт халж, улмаар богино холболт үүссэнээс гал гарсан гэж Тао Пун өртөөний мөрдөн шалгах албаны дэд дарга, дэд хурандаа Киттифан Тхэнтхангчароэнчай мэдэгдэв.
Төмөр замын цахилгааныг салгаснаар Цэнхэр шугамын зарим өртөөнд ойролцоогоор 60 минутын саатал үүсэж, Тха Пхра чиглэлийн үйлчилгээнд нөлөөлсөн байна. Үүний дараа үйлчилгээг бүрэн зогсоожээ. Bangkok Expressway -ийн мэдээлснээр Тао Пун болон Банг О өртөөнүүдийн хоорондын үйлчилгээнд саатал гарсан аж. Цагдаа, Bangkok Expressway-ийн ажилтнууд болон гал сөнөөгчид төмөр зам, цахилгаан таслах системийг шалгаж, учирсан хохирлыг үнэлэн, ослын яг шалтгааныг тогтоохоор ажиллажээ.
Бангкокийн нийтийн хурдан тээврийн систем нь Тайландын нийслэл хотын хэмжээнд зорчигчдод үйлчилдэг төмөр замын сүлжээнүүдийн нэг. Тус сүлжээнд Бангкокийн төвөөр дайран өнгөрч, Тао Пун, Банг Сью зэрэг бүсүүдийг холбодог Цэнхэр шугам багтдаг.
