НИТХ-ын ээлжит VII хуралдааныг даваа гаргийн 10 цагт эхлэхээр товлоод байсан ч АН-ын бүлгийн хүсэлтээр тодорхойгүй хугацаагаар хойшлуулсан тухай мэдээлсэн. Тэгвэл хуралдааныг хойшлуулах захирамж гаргахдаа НИТХ-ын дарга А.Баяр алх цохиогүй шийдвэр гаргасан нь "Монгол Улсын засаг захиргаа, нутаг дэвсгэрийн тухай хуулийн заалтыг зөрсөн" хэмээн МАН-ын бүлгийн гишүүд гарын үсэг зурснаар ээлжит бус ХI дүгээр хуралдааныг өчигдөр үдэш зарлав. Төлөөлөгч Ж.Батбаясгалангийн удирдсан ээлжит бус хуралдаанд МАН-ын бүлгийн 31 гишүүн оролцож 93.5 хувийн саналаар НИТХ-ын дарга А.Баярыг огцрууллаа. Улмаар иргэдийн хурал дахь МАН-ын бүлгээс Д.Ихбаярыг НИТХ-ын даргад нэр дэвшүүлсэн байна. Харин Д.Ихбаярын оронд НИТХ дахь МАН-ын бүлгийн даргаар Ж.Сандагсүрэнг томилжээ.
МАН-ын бүлгээс Д.Ихбаярыг намын удирдах зөвлөлд танилцуулж, бүлгээр хэлэлцэн, НИТХ-ын хуралд албан ёсоор нэр дэвших хүртэл тодорхойгүй хугацаанд завсарлага авчээ.
Тэгвэл нөгөө талд А.Баяр "НИТХ-ын даргыг огцруулах шийдвэр хууль бус. Маргааш албан ёсоор мэдээлэл хийнэ. Нийслэлийн Засаг дарга Х.Нямбаатар НИТХ-ыг хуралдуулахыг хүсэж, “Туулын хурдны зам” төсөл дээр улс төрийн дэмжлэг хүссэн. Нэгдүгээрт, энэ төсөл шалгагдаж байгаа, хоёрдугаарт, УИХ, Засгийн газраас нэгдсэн шийдвэрт хүрээгүй. Гуравдугаарт, иргэд эсэргүүцэж байгаа учраас хэлэлцэх боломжгүй гэсний төлөө НИТХ-ын хурлыг хууль бусаар хуралдуулж, намайг огцруулж байна" гэв.
