Пап лам XIV Лео уушгины хорт хавдрын мэс засал хийлгэснээс хойш анх удаа олон нийтийн томоохон арга хэмжээнд оролцлоо.
71 настай пап лам Гэгээн Петрийн талбай руу харсан Апостолын ордны тагтнаас ням гарагийн Анжелус залбирлыг удирдсан байна. Түүний үгийг сонсохоор олон мянган хүн цугларч, алга ташин, дуу дуулжээ.
Пап Лео өөрт нь эмчилгээ хийсэн эмч нар болон түүний төлөө залбирсан бүх хүнд талархал илэрхийлж, пап ламын үүрэгт ажлаа аажмаар сэргээж байгаагаа хэлэв. “Энэ туршлага надад өвчин эмгэг, биеийн сул дорой байдлыг туулж буй бүх хүнтэй гүн гүнзгий ойр дотно байгаагаа мэдрүүллээ. Одоо энэ эмзэг үе шат ард хоцорсон тул Бурханы тусламж, та бүхний залбирлаар би үйл ажиллагаагаа аажмаар сэргээнэ. Дахин баярлалаа” гэж цугласан олонд хандан хэлжээ.
Пап ламыг уушгины ургалтыг авах мэс засал хийлгэсний дараа бямба гарагт Жемелли эмнэлгээс гаргасан юм. Авсан ургалтад хийсэн шинжилгээгээр уушгины хорт хавдрын хамгийн түгээмэл хэлбэр болох аденокарцинома болох нь тогтоогджээ.
Эмч нар түүнийг мэс заслын дараа сайн эдгэрч байгаа гэж мэдээлсэн. Тиймээс арваннэгдүгээр сарын 6-наас 17-ны хооронд хийхээр төлөвлөсөн Латин Америкийн айлчлалаа хэрэгжүүлэх боломжтой гэж үзэж байна.
