УИХ-ын гишүүн Ж.Золжаргал Мэдээллийн технологи, IT салбарынханд чиглэсэн бодлого хэрэгжүүлэх шаардлагатай байгааг мэдээллээ.
Тэрээр "Монголын хөгжил, залуучуудын хувьд мэдээллийн технологи, IT гэдэг салбар чухал. Үүнийг хөгжүүлэх зорилгоор Мэдээллийн технологийн үйлдвэрлэлийг дэмжих тухай хууль 2024 оны зургаадугаар сард батлагдсан. Гэвч энэ хууль хэрэгждэггүй. Учир нь мэдээллийн технологи, IT чиглэлд ажиллаж, шинийг бүтээж байгаа залуучуудын нийгмийн даатгалын шимтгэлийг нөхөж олгоно, татвараас хөнгөлнө, нэг удаагийн буцалтгүй тусламжаар дэмжинэ гэхчлэн гоё заалтууд байдаг. Мөнгө нь Засгийн газрын тусгай сангаас ирэх ёстой. Гэвч хэрэгжихгүй хоёр жил боллоо. Салбар яам нь асуудлаа тавьдаг, бусад байгууллага нь өөр, өөр тийшээ харчихаад байна. Ч.Анар, Ж.Галбадрах тэргүүтэй таван гишүүн нэгдэн энэ хуулийн хэрэгжилтийг хангуулахын төлөө ажиллана. Бид хэлэлцүүлэг зохион байгуулсан.
Одоо анхаарахгүй бол энэ салбарт ажиллаж байгаа залуучууд улсаасаа гараад дууслаа. Үүнд Засгийн газар манлайлал үзүүлж ажиллах ёстой" гэв.
