Үндэсний их баярын наадмаар олон хоног амрахтай холбогдуулан Гэмтэл согог судлалын үндэсний төвөөс өнөөдөр урьдчилан сэргийлэх зөвлөгөө, осол гэмтлийн талаар ГССҮТ-д мэдээлэл хийлээ.
ГССҮТ-ийн Эрчимт эмчилгээний тасгийн эрхлэгч Ч.Ууганбаяр" Зуны улиралд хүүхдийн түлэгдэлт эрс нэмэгддэг. Энэ оны байдлаар ГССҮТ-ийн яаралтай тусламжаар үйлчлүүлсэн 6000 орчим хүний 60 хувийг хүүхэд эзэлж байна. Тодруулбал, эдгээр хүүхдүүдийн 80 орчим хувь нь 1-2 настай хүүхдүүд байна. Ихэнх хүүхэд халуун хоол, цайнд түлэгддэг бол аялал, зугаалгын үеэр насанд хүрэгчид хорхог, боодог хийхэд түлэгдэх тохиолдол түгээмэл гардаг.
Халуун зүйлд түлэгдсэн тохиолдолд түлэгдсэн хэсгийн хувцсыг болгоомжтой тайлж, хүйтэн усаар 15 минут хөргөх шаардлагатай. Ялангуяа хүүхэд түлэгдсэн бол заавал эмнэлэгт үзүүлж, түлэгдлийн зэргийг тогтоолгон эрт эмчилгээ хийлгэх хэрэгтэй. Эс бөгөөс гэмтэл хүндрэх аюултай. Элсэн чихэр, саван түрхэх зэргээр түлэгдсэн хэсгийг улам цочроох зүйл хэрэглэх нь эрсдэлтэй" гэв.
