Цэргийн ангиудад гарч буй зүй бус асуудлууд олон хүний санааг зовоодог. Үүнтэй холбоотойгоор УИХ-ын гишүүн С.Одонтуяа тэргүүтэй гишүүд ХЭҮК-ын тухай хуульд нэмэлт, өөрчлөлт оруулахаар хуулийн төсөл өргөн мэдүүллээ. 

Хууль санаачлагч УИХ-ын гишүүн С.Одонтуяа "Эрүүдэн шүүхтэй холбогдуулан ХЭҮК-ын тухай хуульд нэмэлт, өөрчлөлт оруулахаар хуулийн төсөл боловсруулсан. Энэ хууль батлагдсан тохиолдолд цэргийн ангиудад гарч байгаа гэмт хэрэг, нас баралт байхгүй болно гэж харж байгаа. Цэргийн ангиуд ХЭҮК-ын тухай хуульд эрүүдэн шүүхээс урьдчилан сэргийлэх үндэсний ажиллагаа явуулдаг газруудын жагсаалтад байдаггүй учраас ийм хэргүүд гарч байна. Тиймээс ХЭҮК-оос урьдчилан сэргийлэх үндэсний ажиллагаа явуулдаг газруудын жагсаалтад цэргийн ангиудыг оруулахаар хуулийн төслөө боловсруулсан" гэв.

ХЭҮК-ын тухай хуульд заасны дагуу тус комисс дараах газруудад эрүү шүүлтээс урьдчилан сэргийлэх ажиллагаа явуулдаг байна.

-Хорих байгууллага,

-Цагдан хорих анги,

-Түр болон албадан саатуулах газар,

-Сэтгэцийн эрүүл мэндийн төв,

-Хүүхдийн, хөгжлийн бэрхшээлтэй иргэдийн болон ахмадын асрамжийн газар,

-Сургуулийн дотуур байр,

-Албадан эмчилгээний байр,

-Дүрвэгсдийн байр,

-Цэргийн сахилгын байр,

-Хилийн шалган нэвтрүүлэх боомт дахь түр саатуулах болон хамгаалах байр.

УИХ-ын гишүүн С.Одонтуяа нарын гишүүдийн боловсруулсан хуулийн төсөл батлагдвал ХЭҮК дээрх газруудаас гадна цэргийн ангиудад эрүү шүүлтээс урьдчилан сэргийлэх ажиллагаа явуулдаг болох нь.