Засгийн газрын өнөөдрийн хуралдааны үеэр Ерөнхий сайдын зүгээс Багахангай-Хөшигийн хөндий-Эмээлт чиглэлийн 214.9 км төмөр замын төслийг эрчимжүүлэх үүргийг Зам тээврийн сайд Б.Дэлгэрсайханд өгч, салбарын уялдаа холбоог сайжруулж, нэгдсэн удирдлагаар хангахыг үүрэг болголоо. 

Ирэх сард ашиглалтад орох уг төмөр замын зурвас газартай давхцаж байгаа иргэн, ААН-ийн эзэмшил газрыг чөлөөлөх, обьектыг нүүлгэн шилжүүлэх, цахилгаан дамжуулах болон түгээх шугам, дэд станцыг хамгаалах, шилжүүлэх ажлыг шуурхай зохион байгуулна. Энэхүү төмөр зам нь Багахангай өртөөнөөс салаалан Төв аймгийн Сэргэлэн сумын Хөшигийн хөндий болон мөн аймгийн Алтанбулаг сумаар дамжин Эмээлт өртөөнд холбогдоно. Төмөр замын бүтээн байгуулалтыг “Монголын төмөр зам” ТӨХК нь 2 үе шаттай хэрэгжүүлж байна. 

-2025 оны дөрөвдүгээр сарын 25-нд эхэлсэн Багахангай өртөөнөөс Хөшигийн хөндий хүртэлх 87.8 км төмөр замын барилга угсралт, таван байршилд барьж буй гүүрэн байгууламж, ус өнгөрүүлэх хоолойн ажлууд 100 хувь, төмөр замын дээд бүтцийн угсралтын ажил 86.6 хувийн гүйцэтгэлтэй байна. 

-2026 онд эхэлсэн Хөшигийн хөндийгөөс Эмээлт өртөөнд холбох газар шорооны ажил 48.2 хувьтай үргэлжилж байна. Төслийн бүтээн байгуулалтад дотоодын 95 ААН, 4,000 гаруй инженер, техникийн ажилчин оролцож, III зэрэглэлийн ачаа, зорчигч тээврийн зориулалттай 127.1 км гол зам, 177.4 км дэлгэмэл урт бүхий 3 зөрлөг, 4 өртөө барихаар төлөвлөжээ гэж Засгийн газрын хэвлэлийн мэдээлэл дурджээ.