Хөлбөмбөгийн түүхэн дэх хамгийн агуу замналуудын нэг болох Криштиану Роналдугийн Дэлхийн аварга шалгаруулах тэмцээний сүүлийн тоглолт харуусал, нулимсаар өндөрлөлөө. Португалын шигшээ баг шөвгийн 16-гийн шатанд хөрш Испанид 1:0-ээр хожигдсоноор тэмцээнээ дуусгав. Даллас хотод болсон уг тоглолтын нэмэлт цагт Испанийн тоглогч Микел Мерино хожлын гоол оруулж, Португалыг тэмцээнээс мулталжээ.
Өдгөө 41 настай, таван удаагийн "Алтан бөмбөг"-ийн эзэн Роналду карьертаа клуб болон улсынхаа төлөө 976 гоол оруулж, зургаан ДАШТ-д дараалан гоолдсон цорын ганц тоглогч болсон ч дэлхийн аваргын хамгийн том цомыг өргөж чадалгүй зодог тайлахаар болж байна. Тэрээр өмнө нь энэ ДАШТ түүний сүүлийнх болно гэдгийг зарлаад байсан юм.
Тэмцээний турш Роналдуг заавал гараанд гаргах ёстой эсэх асуудал олны анхаарлын төвд байсан бөгөөд түүнийг талбай дээр хангалттай үр бүтээлтэй тоглож чадахгүй байна хэмээн шүүмжлэх хүн олон байв. BBC-ийн шинжээч Крис Саттон "Роналду талбай дээр юу ч хийж чадсангүй. Дасгалжуулагч Роберто Мартинез од тоглогчийнхоо аясыг дагаж, Гонсало Рамус зэрэг залуу довтлогчдоо талбайд гаргалгүй байсаар багтаа гай тарилаа" хэмээн хатуу шүүмжилжээ.
Роналду энэ удаагийн ДАШТ-д 18 удаа хаалга руу цохиж, ердөө 4 гоол (үүнээс нэг нь торгуулийн цохилт) оруулсан үзүүлэлттэйгээр тэмцээнийг өндөрлүүлж байна.
Португалын шигшээ багийн ахлах дасгалжуулагч Роберто Мартинез тоглолтын дараа үүрэгт ажлаасаа чөлөөлөгдөж байгаагаа албан ёсоор мэдэгдлээ. Тэрээр "Миний Португалтай байгуулсан гэрээ өнөөдөр дуусгавар болж байна. Би ДАШТ-д түрүүлэх зорилготой ирсэн, зорилгоо биелүүлж чадаагүй тул цаашид үргэлжлүүлэх нь утгагүй юм" хэмээгээд Роналдуг "Хөлбөмбөгийн тод жишээ, шүтээн" хэмээн магтсан байна.
